Qəbələ”nin baş məşqçisi Roman Qriqorçuk Topaz Premyer Liqanın 4-cü turunda “Neftçi”yə 8:0 hesabı ilə qalib gəldikləri oyundan sonra mətbuat konfransı keçirib.
Korner.az-ın məlumatına görə, o, jurnalistlərin suallarını cavablandırıb.
– Oyundan öncə bu cür hesabı gözləyirdiniz?
– Əlbəttə, həmişə böyükhesablı qələbə qazanmaq istəyirdik. Bu gün bizdə yaxşı alındı.
– “Neftçi” tarixinin ən böyükhesablı məğlubiyyətini aldı. Bunu bilirdinizmi?
– Xeyr. Bundan xəbərim yox idi.
– Belə qələbə Avrokubok oyunu öncəsi komandada arxayınlıq yarada bilməz?
– Yaxşı nəticə bizə daha yüksək motivasiya verdi. Pozitivik. Belə hallara öyrəşmək daha yaxşıdır. Düşünmürəm ki, bu, futbolçulara təsir edəcək.
– Bu gün əsas heyətə şans verdiniz. Olmazdı ki, bəzi oyunçuları Avrokubok oyunu üçün qoruyasınız…
– Bizdə heç nə dəyişməmişdi. Heyətə layiq olan futbolçulara şans verdik. Ümumiyyətlə, limiti də nəzərə almışdıq.
– Yeni transferlərin oyunundan razı qaldınızmı?
– Mən bütün oyunçularımdan razı qaldım. Futbolçularımı ayırmaq istəmirəm. Bəzi məqamlar var ki, onlar üzərində çalışmalıyıq.
– “Anderlext”lə oyunda hansı nəticəyə ümid edirsiniz?
– Rəqibin oyunlarına baxmışam. Bu gün onların oyunu haqqında danışa bilmərəm. Tam məlumat toplamalı və daha sonra daha dəqiq, konkret danışmalıyam.
Qol.az
