Tallinin "Lillekula" stadionunda 19 yaşlılar arasında keçirilən Avropa çempionatında İspaniya – Yunanıstan (1:0) final qarşılaşmasını hollandiyalı hakim Danni Makkeli idarə edib.
Korner.az -ın məlumatına görə, adi həyatda “part-time” polis işləyən Makkeli açıqlamasında bildirib ki, hakimlik üçün çox çalışıb, can qoyub. Makkelidən soruşanda ki, "Belə turnirə sizi göndərəndə məqsədiniz nə olur?", cavab verib ki, "Bu cür vacib oyunlarda mənə ehtimad göstərənlərin inamını doğrultmaq şansım olur”.
29 yaşlı Makkenli gənc yaşlarından “fitlə işləməyə” adət edib. Hakimliyə gəlişini isə belə xatırlayır: "Hələ 10 yaşım olanda məktəbdə bədən tərbiyəsi müəllimimiz mənə futbol və voleybol oyunlarında hakimlik etməyi tapşırırdı. Bu mənim cox xoşuma gəlirdi. Eyni hal mən yerli klubda futbol ilə məşğul olanda da baş verirdi. Bəzən həvəskar oyunlarında hakim çatmayanda mən könüllü gedirdim. İllər keçdi və mən başa düşdüm ki, digər oyunçular bu rolda məni daha çox ciddi qəbul etməyə başlayıblar. Bir gün Hollandiya Futbol Assosiasiyasının bir nəfər məsul şəxsi tərəfindən rəsmi oyunda hakimlik etmək təklifi aldım və beləcə bu işlə ciddi şəkildə məşğul olmağa başladım".
Makkeli məsləhətləri qiymətləndirdi və nəticədə Hollandiya çempionatının elit divizionunda oyun idarə etmiş ən gənc hakim kimi tarixə düşdü. 19 sentyabr 2009-cu il tarixində Rotterdamda keçirilən "Herakles" – "Sparta" oyunu onun ilk rəsmi oyunu oldu. Ardından UEFA Avropa Liqasının "Zalsburq" – "Metallurq" və "Atletiko" – "Stremsqodset" oyunlarını idarə etdi.
Estoniyada keçirilən cari Avropa çempionatının qrup mərhələsində isə o, meydan sahibləri ilə Yunanıstanın qarşılaşmasını, eləcə də İngiltərə – Fransa oyununu idarə etmişdi.
Referinin fikrincə, final yeni bir şey öyrənmək və təcrübə qazanmaq üçün böyük imkandır: "Mən məmnuniyyətlə bu turnirə hazırlaşdım. Hakim-inspektorlardan və həmkarlarımdan çox şey öyrəndim. Karyeramın bu çağında final mənim üçün ən vacib oyun oldu. Burada oyunçuların səviyyəsi çox yüksəkdir və hər iki finalçı möhtəşəm keçmişi olan futbol ölkəsidi. Hər iki komanda çılğın və fiziki cəhətdən çox yaxşıdı”.
Qeyd edək ki, bazar günü baş tutmuş finalda Makkelinin assistentləri Belçikadan Yves De Neve və rus Aleksey Lebedov olub. Ehtiyat hakim isə İsveçrədən Alain Bieri idi.
