Ya coş, ya sus! (YAZI)

Avropa Liqasının birici təsnifat mərhələsində uğurlu nəticələr qazanaraq mərhələ adlayan "Xəzər Lənkəran" bunu bir daha edə bilər. Cənub təmsilçisinin buna imkanı, potensialı çatır. Düzdü, ilk təsnifat turunda Estoniya "Noimme Kalyu"su Lənkərandakı oyunda "Xəzər Lənkəran" və azarkeşlərinin əsəbləri ilə oynamışdı. Amma nəticədə Tallində qazanılan qələbə (2:0) "ağ-yaşıllar"ı "Lex"ə rəqib etdi. Burası da var ki, "Nomme Kalyu" "Lex" deyil, ancaq…

"Xəzər Lənkəran" ilk oyunda 1:1 oynasa da, bu, hər şeyin sonu deyil. Eyni ssenarini Poznanda da rəqib komandaya yaşatmaq olar. Niyə də olmasın?

Klubun fəxri prezidenti Lənkəranda oyunu izləmədi. "Xəzər Lənkəran" 2:2 oynadı və cavab matçında Tallinə yollanan Mübariz Mənsimovun ayağı düşərli oldu – 2:0. Eyni hal ikinci mərhələdə də təkrarlandı: Avropa Liqasına qatıldıqdan sora daim iddialı açıqlamaları ilə gündəmi zəbt edən Yunis Hüseynovun komandası "Lex"lə “sülh”ə razılaşdı – 1:1.

Ancaq çərin səfər oyunu üçün Mübariz Mənsimovun Poznana yollanacağı deyilir. Yenə söz "Xəzər Lənkəran"a qalır.

2008-ci ildə bu komandalar qarşılaşmışdı. Bakıda 0:1, Polşada isə 1:4 hesabı qeydə alınmışdı. Lakin ümid edək ki, bu dəfə tam fərqli oyun görəcəyik. Hər halda, "Lex"in keçiləsi rəqib olduğu Lənkəranda göründü.

"İnter" misalı…

Bu da var ki, "İnter" "Lex"lə qarşılaşdığı dönəmdə evdə 0:1 hesablı məğlubiyyətə baxmayaraq səfər meydanında 1:0 hesablı qələbə qazana bilmişdi. Sadəcə "bankirlər" oyunsonrası penaltilərdə Poznan təmsilçisinə boyun əymişdi. Sxadadzeli "İnter" "lotoreya"da "Lex"ə məğlub olsada əsas vaxtda qələbə qazanmağın mümkün olduğunu isbat etmiş oldu.

"Xəzər Lənkəran", onlar üçün oyna!!!

Daim komandalarına dəstək olan, onları yalnız buraxmayan "Xəzər Lənkəran"lı azarkeşlərin Poznan tərəfdarlarından nəyi əksikdi? "Fırtınalar meydanı"nda xarüqələr yaradan, matçın sonuna kimi komadaya dəstək olan fanatlara qələbə yaraşır!!!

Fanatlar sözünü deyir. İndi söz sənindi, Yunis Hüseynov və komandası!

P.S. Aşağıdakı video "Xəzər Lənkəran"ın "Lex"lə 2008-ci ildəki qarşılaşmasındandı. Bu oyunun təkrarlanmaması arzusu ilə…