Azərbaycan millisi və “Mlada Boleslav”ın qapıçısı Kamran Ağayev Çexiya çempionatının 13-cü turunda “Ostrava” ilə səfər matçında qırmızı vərəqə almaqla qalmaqala səbəb olub
Start heyətdə oyuna başlayan Kamran qarşılaşmanın 73-cü dəqiqəsində hakimə yersiz etiraza görə sarı vərəqə ilə cəzalandırııb. Ağayev bundan iki dəqiqə sonra vaxtı uzatdığı üçün ikinci dəfə xəbərdarlıq alıb və referi tərəfindən meydandan qovulub.
Kamranın hərəkətlərinə münasibət bildirən “Mlada Boleslav”ın baş məşqçisi Duşan Uqrin bunları deyib: “Bu, çox kobud səhv idi. Biz bunu komanda daxilində müzakirə edəcəyik. Kamran Ağayev düzgün hərəkət etmədi”.
Komandanın kapitanı Lukaş Maqer Kamranın düzgün hərəkət etmədiyini dilə gətirib: “İlk vərəqəni o, hakimi söydüyünə görə aldı. Mən bilmirəm o hakimə nə dedi. Axı, Kamran ingilis dilində danışa bilmir. Yəqin ki, o, hakimi Azərbaycan dilində söyüb. Hətta bundan sonra da Ağayev emosiyalarını cilovlaya bilmədi və iki dəqiqə sonra növbəti səhvi etdiyindən meydandan qovuldu”.
Geridə qalan turlarda 17 xal toplayan “Mlada Boleslav” 16 klub arasında 8-ci pillədə qərarlaşıb.
