Yeniyetmə futbolçu Elnur Cəfərov “Xəzər Lənkəran”ın yeni rekordçusu olub.
Korner.az-ın klubun rəsmi saytına istinadən verdiyi məlumata görə, cənubluların Topaz Premyer Liqasının XIX turunun “İnter”ə 2:3 hesabı ilə uduzduqları ev oyununda start heyətində yer alan hücumçu klubun 9 illik tarixində ən gənc futbolçusu olub.
1997-ci il martın 28-də anadan olan Elnur fevralın 11-dəki oyunda meydana çıxanda 16 yaşı tamam olmamışdı. 15 yaş 320 günlüyündə “Xəzər Lənkəran”ın əsas heyətində debüt edən futbolçu buna 16 yaşından tez nail olan ilk oyunçu olub.
Bunadək rekord Kazım Kazımlıya məxsus idi. O, 16 yaş 66 günlüyündə əsas komandada debüt etmişdi. Artıq 3-cü olan Fikrət Ulduzlu 16 yaş 237 günlüyündə buna nail olub. Daha 2 oyunçu – İlqar Qurbanov (16 yaş 310 gün) və Rahid Əmirquliyev (16 yaş 344 günlük) 17 yaşı tamamlamamış debüt imkanı qazanıb.
Kazımlı və Ulduzlunun debütü ölkə kubokuna təsadüf edib. Onlar çempionatda ilk matça nisbətən gec çıxıblar. Debütü Premyer Liqaya təsadüf edən Elnur isə çempionatda ən gənc oyunçu olan Qurbanov (16 yaş 310 gün) və Əmirquliyevi (16 yaş 344 günlük) arxada qoyub.
