“Mən ora birbaşa müqavilə imzalamağa getmişdim. Hamı başa düşür ki, Azərbaycanda ustalıq səviyyəsini qaldırmaq olmur. Amma yaxşı pul qazanmaq imkanı var. Futbol agenti ilə danışımız olmuşdu. Müqavilə məni və “Xəzər Lənkəran"ı qane edirdi. Mənə yaxşı şərtlər təklif olunmuşdu. Türkiyədə təlim-məşq toplanışında olan komandanın düşərgəsinə getdim ki, münasibətləri rəsmiləşdirək. Amma ora gedəndə müəyyən anlaşılmazlıq yarandı".
Korner.az-ın məlumatına görə, bu sözləri bu günlərdə “Xəzər Lənkəran”ın düşərgəsində olan belarusiyalı futbolçu İvan Deniseviç deyib.
Təcrübəli futbolçu ölkəsinin mətbuatına verdiyi açıqlamada "Xəzər Lənkəran"a transferinin baş tutmamasının səbəbini açıqlayıb:
"Biz başqa şərtlərə razılaşmışdıq, amma sonra hər şey dəyişdi. Dedilər ki, klubun prezidenti gəldikdən sonra bütün məsələlər yoluna qoyulacaq. Mən razılaşdım. “Krivbass”la yoxlama oyununda meydana çıxdım. 0:6 hesabı ilə uduzduğumuz görüşdə bir dəfə də olsun meydanın rəqibə aid hissəsinə keçə bilmədik. Bu oyundan sonra daha nəyisə gözləməyin mənası yox idi. Müqavilə ilə bağlı yeni bir şey də yox idi. Ona görə də əşyalarımı yığıb evə qayıtdım” – deyə o bildirib.
Qeyd edək ki, İvan Deniseviç Belarusa qayıtdıqdan sonra bu ölkənin “Neman” klubu ilə müqavilə imzalayıb.