Xorvatiya yığmasında növbəti ciddi itki: “İnter”in futbolçusu millimizə qarşı oynamayacaq?
11.03.2019 , 10:33
Avropa çempionatının seçmə mərhələsinin ilk turunda doğma meydanında millimizi qəbul edəcək Xorvatiya yığması növbəti ciddi itki ilə üzləşib.
Komandanın yarımmüdafiəçisi Marselo Brozoviç sıradan çıxıb. “İnter” klubunun futbolçusu A Seriyasının XXVII turunda SPAL-la qarşılaşmanın 42-ci dəqiqəsində zədələnib. Nəticədə oyunu davam etdirə 27 yaşlı futbolçu meydançanı göz yaşları içində tərk edib. Yarımmüdafiəçi bu gün tibbi müayinədən keçdikdən sonra zədənin nə dərəcədə ciddi olub-olmadığı müəyyənləşəcək. İlkin ehtimallara görə, Brozoviç bir neçə həftə yaşıl meydanlardan kənarda qalacaq. Belə olarsa, yığmamızın rəqibinin baş məşqçisi Zlatko Daliç onu da heyətdən kənarlaşdırmalı olacaq.
Bu, millimizlə oyunöncəsi Xorvatiya yığmasında artıq 5-cü ciddi itkidir. Brozoviçdən əvvəl digər zədəlilər – Şime Vrsalko, Marko Pyatsa, Yosip Pivariç və cəzalı Deyan Lovrenin komandamıza qarşı oynamayacağı açıqlanıb. Bundan başqa, komandanın əsas hücumçularından Ante Rebiç də dizindəki zədəyə görə Azərbaycanla görüşü buraxa bilər.
Qeyd edək ki, Xorvatiya – Azərbaycan görüşü martın 21-də baş tutacaq.
