“Avro-2016″nın seçmə mərhələsində millimizin rəqiblərindən olan Xorvatiya yığması UEFA-nın verdiyi cəza ilə bağlı Apellyasiya Komitəsinə müraciət edəcək.
Korner.az-ın xarici KİV-lərə istinadən verdiyi məlumata görə, bu barədə Xorvatiya Futbol Federasiyasının prezidenti Davor Şuker açıqlama verib.
D.Şuker UEFA-nın qərarının onlar üçün şok olduğunu bildirib: “UEFA-nın qərarı bizim üçün şok oldu. Baş verənlərə görə məyusam. Norveçlə oyunda baş verənlər bir daha təkrarlanarsa, bizi hansı cəzaların gözlədiyini təsəvvür edirəm. Komandanın xalı silinəcək və bəlkə də turnirdən kənarlaşdırılacaq. Ancaq biz UEFA-nın qərarı ilə bağlı Apellyasiya Komitəsinə müraciət etməyi düşünürük”.
Qeyd edək ki, Norveçlə oyunda (5:1) Xorvatiya millisinin azarkeşlərinin irqçi şüarlar səsləndirmələri və pirotexniki vasitələrdən istifadə etmələri səbəbindən UEFA meydan sahiblərini cəzalandırıb. Qərara əsasən Xorvatiya yığması İtaliya ilə növbəti ev oyununu boş tribunalar önündə keçirəcək. Bundan başqa federasiya 50 min avro məbləğində cərimə ödəyəcək.
