“Real”ın təcrübəli futbolçusu Xabi Alonso İspaniyada Türkiyənin NTV Spor kanalına müsahibə verib.
Korner.az həmin müsahibəni təqdim edir:
– Arxada qalan mövsüm haqqında nə deyə bilərsən? Komandanın, özünün Çempionlar Liqası və La Liqada çıxışını necə dəyərləndirisən? Kral kubokunun finalında da “Atletiko”ya məğlub oldunuz.
– Hamımız daha yaxşı ola biləcəyimiz haqqında həmfikirik. Çempionlar Liqasının finalına çox yaxınlaşmışdıq. Hamımız finalda oynamağı çox istəyirdik. Kubokun finalına çıxsaq da, məğlub olduq. Çempionat da heç yaxşı keçmədi. Məncə, bu, “Real” üçün kifayət deyil. Növbəti mövsümdə daha da yaxşı olmalıyıq. Fasilədə nələri daha yaxşı edə biləcəyimizi düşünəcəyik. Hər şey yeni mövsümdən başlayacaq.
– Bu il ÇL-in 1 /4 finalında “Qalatasaray”la oynadınız. Hər iki oyun haqqında nə deyə bilərsən?
– Həqiqətən, maraqlı oyunlar keçdi. Cavab oyununda cəzalı idim. Görüşü Madriddə televiziyadan izlədim. Rəqib üçüncü qolu vuranda çox həyəcanlandım. Stadionda azarkeşlərin də böyük dəstəyi var idi. Hücum futbolu oynadılar. “Qalatasaray” çox yaxşı komandadı və çox yaxşı futbolçuları var. Bu səbəbdən bu səviyyəyə gəlib çatıblar.
– Türkiyədə hansı futbolçuları və ya məşqçiləri tanıyırsan?
– Son dövrlərdə “Fənərbaxça”ya qarşı oynamamışam. Amma əvvəllər bir çox türk komandaları ilə qarşılaşmışam. Avroliqada “Beşiktaş”ın və “Fənərbaxça”nın olduğunu bilirdim. Bir neçə dəfə də “Qalatasaray”a qarşı rəqib olmuşam. Bəzi türk komandalarını tanıyıram. Çox yaxşı komanda yoldaşlarım olub. Məsələn, Nihat Kahveci ilə “Real Sosyedad”da oynamışam.
– Çox yaxşı futbolçu idi. Elə deyilmi?
– Bəli, çox yaxşı oyunçu idi. Nihat Kahveci ilə “Real Sosyedad”da gözəl oyunlarımız olub. Hələ də əlaqəmiz var.
– Komanda yoldaşın Məsut Özil haqqında nə demək istərdin?
– Məsut haqqında nə deyə bilərəm ki? Əla oyunçudu. Komanda üçün vacib futbolçudu. Onunla oynamağı sevirəm. Çünki top məndə olanda onun meydanda olduğunu görəndə fərqli bir şey edə biləcəyimi bilirəm. Şübhəsiz, dünyanın ən yaxşı futbolçularından biridi.
– Bəs “Atletiko”da oynayan Arda Turan?
– Bəli, “Atletiko”da əla mövsüm keçirdi. Komandası üçün vacib oyunçudu. Səhv etmirəmsə, Madriddə olduğu üçün xoşbəxtdi.
– “Real”da məşqçi dəyişikliyi olarsa, növbəti mövsüm bu komandaya necə təsir edər?
– Futbolçuları nəzərə alsaq, çox yaxşı komandamız var. Komandada tarazlıq yaxşıdı, amma öz üzərimizdə də işləməliyik. Kim gəlirsə, gəlsin, çox yaxşı futbolçulardan təşkil olunmuş komanda ilə işləyəcək. Əlbəttə, məşqçinin seçdiyi taktika da bizim üçün vacibdi.
