"Xəzər Lənkəran"ın kapitanı Rahid Əmirquliyevin müsahibəsi
– Oyun haqda fikirləriniz…
– Bilirdik ki, bu matç bizim üçün çətin və vacib oyundu. 8 il idi ki, doğma meydanımızda “Neftçi”yə uduzmurduq. İstəyirdik ki, layiqli oyun nümayiş etdirib qələbə qazanaq.Çox təəssüf, alınmadı.
– İkinci hissədə “Xəzər Lənkəran” çox zəif oynadı. Bunun səbəbi nə idi?
– Nə deyə bilərəm… Öz oyunumuza baxıb araşdıracağıq. Səhvlərimizin üzərində işləyəcəyik. Belə davam etmək olmaz. Hər oyun meydana çıxırıq və uduzuruq. Azarkeşlərimiz bizi gəlib dəstəkləyirlər. Azarkeşlərimizin qarşısında məğlub olmaq istəmirik. “Xəzər Lənkəran”a belə nəticələr yaraşmır. Belə dəstəklə yaxşı nəticələr etməliyik. Yanvar ayına qədər gözləməliyik.
– Komandanı çiynində aparmaqdan yorulmamısan?
– Komandamızdakı futbolçular gənclərdir. Hər oyun məğlubiyyət, məğlubiyyət…. Bunu dərk etmək çox çətindir. Bu nəticələr də futbolçulara pis təsir edir.
– Yanvardan sonra komandada işlər qaydasına düşəcək?
– Bilmirəm. Rəhbərlik söz verib. Onlardan soruşsanız daha yaxşı olar. Biz də ümid edirik ki, hər şey yaxşı olacaq. Belə davam eməz.
– Yanvardan sonra komanda da dəyişiklik olmasa, “Xəzər Lənkəran”dan getmək fikrin var?
– Açığı, mövsümün sonuna kimi müqaviləm var. Belə davam etməməlidir. Dəyişikliklər olmalıdır. Axı, azarkeşlər gəlib bizi dəstəkləyirlər. Biz də bunun qarşılığını verməliyik.
– Yəni, Rahid Əmirquliyev komandadan gedə bilər?
– Bu, futboldur. Futbolda hər şey ola bilər. Yenə bildirirəm ki, mövsümün sonuna kimi müqaviləm var. Belə davam edərsə, ayrıla bilərəm.
sportal.az
