Bu həftə Azərbaycan Kubokunda yarımfinal mərhələsinə start veriləcək. Aprelin 16-da baş tutacaq ilk oyununda “Xəzər Lənkəran” səfərdə “Qəbələ” ilə görüşəcək.
Korner.az-ın məlumatına görə, tarixində 8-ci dəfə yarımfinala yüksələn “ağ-yaşıllar” bu mərhələdə 15-ci oyununu keçirəcək. 10 illik tarixində yalnız iki dəfə (2008/09 və 2011/12) yarımfinala çıxa bilməyən komanda 2 dəfə finalın biraddımlığında dayanıb. 2004/05 və 2005/06 mövsümlərində yarımfinalda mübarizəni dayandıran “Xəzər Lənkəran” sonrakı 8 ildə bu mərhələdə dayanmayıb. Belə ki, son 5 yarımfinalda komanda mərhələni uğurla adlayıb.
Ardıcıl 2-ci dəfə finala çıxmaq üçün mübarizə aparan “Xəzər Lənkəran” əvvəllər də “Qəbələ”ni kubokda sınağa çəkib. 6 il əvvəl də yolları yarımfinalda kəsişən komandaların duelində “ağ-yaşıllar” səfər qələbəsi ilə finala yüksəlmişdi.
Ümumilikdə isə Lənkəran təmsilçisi yarımfinalda keçirdiyi 14 oyunun yarısında – 7 dəfə qalib gəlib. 3 heç-heçəsi olan komanda 4 dəfə uduzub. Yarımfinalda 16 qol vuran lənkəranlılar 13 top buraxıb.
