Gəncədə 10-cu duel
“Xəzər Lənkəran” Topaz Premyer Liqasında XIV turun matçını da səfərdə keçirəcək.
Korner.az-ın klubun rəsmi saytına istinadən məlumatına görə, ardıcıl 2-ci dəfə rəqib meydanına çıxacaq Karles Martorellin yetirmələri bu dəfə Gəncədə “Kəpəz”in qonağı olacaq. Gəncədəki qarşılaşma rəqiblər arasında 10-cu – yubiley matçı olacaq.
İndiyədək baş tutan 9 qarşılaşmanın hamısı çempionat çərçivəsində olub və komanda cəmi 2 dəfə xal itkisi ilə üzləşib. 1 heç-heçə və 1 məğlubiyyətə üzülən “Xəzər Lənkəran” 7 dəfə “Kəpəz”i məğlub edib. Bu matçlarda 17 qol vuran komanda öz qapısında 7 qol görüb.
Rəqiblər arasında ilk duel Lənkəran təmsilçisinin yarandığı 2004-cü ilə təsadüf edib. 2004/05 mövsümündə hər 2 matçda quru qələbə qazanan “Xəzər Lənkəran” Gəncədəki qələbə ilə “Qızıl oyun”a vəsiqə qazanıb ilk medalını – gümüşü təmin etmişdi. Klub tarixinə ən uğursuz mövsüm kimi düşən 2005/06 mövsümündə də “Kəpəz”lə 2 oyun baş tutub. Həmin vaxt “Xəzər Lənkəran” evdəki matçda ilk dəfə gəncəlilərdən qol buraxıb və ilk dəfə xal itirib.
Həmin ilklər ev oyunları üçün yeganə olaraq qalır. Belə ki, Lənkərandakı qarşılaşmalarda 4 qələbəsi olan “Xəzər Lənkəran” öz meydanında yalnız 7 il əvvəl “Kəpəz”ə xal verib. Bu matçlardakı top fərqi isə 9:1-dir.
2006-cı ildə “Kəpəz” fəaliyyətini dayandırıb yenidən bərpa olunduğu üçün qərblilərlə növbəti duel 2010-cu ildə baş tutdu. Bundan sonrakı ilk matçda – Gəncədə gözlənilmədən böyük hesabla uduzan komanda 1-ci və sonuncu dəfə xalsız qaldı. Bundan sonra “Kəpəz” üzərində ardıcı 4 qələbə qazanan “Xəzər Lənkəran” son 2 dueldə eyni sayda – 4 qol vurub. Maraqlıdır ki, bu görüşlərin hər ikisində “Xəzər Lənkəran”ın qollarını 4 müxtəlif oyunçu vurub.
Əvvəl səfərdə, sonra evdə böyük hesablı qələbəyə sevinən “ağ-yaşıllar” rəqib meydanındakı 4 qarşılaşmada 3 qələbə qazanıb və yalnız 1 dəfə uduzub. Gəncədəki oyunlarda top fərqində üstünlük qonaqların tərəfindədir – 8:6.
