Onlar neçə gün idi bu oyunu gözləyirdi. Günləri, saatları, hətta dəqiqələri sayırdılar. Bunlar isə yox. Onlar ümidlə yaşayırdılar, Malta "Slima"sını cırmaqlaya-cırmaqlaya keçən klubun Hayfa "Makkabi"si önündə yeni nəsə edəcəyini gözləyirdilər. Bunlar isə Hayfa gəzintisini, alış-verişi…
Onlar Təl-Əviv "Makkabi"sinə, Moldova "Olimpiya"sına və bu kimi digərlərinə müqavimətsiz uduzan komandanın fanatları, sadiqləridi. Onlar isə "bankomat"ların…
…Minlərlə azarkeşi olan klubun Hayfa "Makkabi"si önündə sərgilədiyi oyun yenə ümid vermədi və olan qalanları da "basdırdı". Əslində bu ümid elə Malta klubu ilə oyunlarda "ölmüşdü". Özündən qat-qat zəif komandanın qapısından 2 oyunda cəmi 2 top keçirmək və bir qələbə qazanan klub üçün Avropa Liqasının qrup mərhələsini hədəfləmək yalnız xülya olardı. Təbii ki, bu arzularla yaşayan yüzlərlə, minlərlə "Xəzər" fanatından fərqli, bunu klub rəhbərliyi düşünmür. Düşünürsə də, yalnız veriləcək açıqlama, müsahibələrə material kimi qeyd edir.
Misal üçün, klubun vitse-prezidenti Tuyqun Nadirov oyundan öncəki müsahibəsində səsləndirdiyi fikirə diqqət edək:
"Komandamız birinci mərhələdəki oyunla müqayisədə daha hazırlıqlıdı. Belə deyək, onda heyət “oturuşmamışdı”. Bildiyiniz kimi, “Slima” ilk görüşün vaxtı dəyişdirildi. Nəticədə planlarımız pozulmuşdu. Ancaq indi komanda qurulan plan əsasında çalışır. Həmin planın bir bəndi o idi ki, oyun keçiriləcək məkana – İsrailə daha erkən gəlib adaptasiya keçək, hazırlaşaq. Belə deyək ki, hər şey qaydasındadır, komanda oyuna hazırdır".
"Makkabi" ilə oyunda "Xəzər Lənkəran”ın göstərdiyi oyunu və Nadirovun fikirlərini yan-yana qoyun.
Qoyammadız?
Komanda hazır, şərait əla, heyət "oturuşub"… Daha nə lazımdı səfərdən sərfəli nəticə ilə dönməyə?
İndi kimin dediyinə inanaq?!
Səxavət QURBANOV
