“Xəzər Lənkəran”ın futbolçusu Alvaro Silva klub tarixində qol sevinci yaşayan ilk ispaniyalı olub.
Korner.az-ın klubun saytına istinadən yaydığı xəbərə görə, Topaz Premyer Liqanın 24-cü turunun AZAL-la oyununda qol hesabını açan müdafiəçiyədək onun heç bir həmyerlisi komandanın heyətində qol sevinci yaşamamışdı.
Ümumilikdə isə Alvaro klub tarixində rəqib qapısına yol tapan 81-ci futbolçu olub. Bu 81 oyunçudan başqa daha 7 rəqib futbolçu öz qapısına qol vurub. “Xəzər Lənkəran”ın qol vuran oyunçularına gəlincə isə onların 29-u yerli, 52-si əcnəbi futbolçudur. Milliləşənləri də nəzərə almaqla ilk ispaniyalıya qədər fərqlənən 51 legioner 21 ölkəni təmsil edirdi: Rumıniya – 12, Braziliya – 8, Türkiyə – 5, Bolqarıstan – 4, Portuqaliya, Kosta Rika, Argentina, Albaniya, Serbiya – hərəsindən 2, Nigeriya, Moldova, Mali, Kolumbiya, Honduras, Fransa, Fil Dişi Sahili, Almaniya, Xorvatiya, Sloveniya, Syerra Leone, Yunanıstan – hərəsindən 1. İspaniya bu siyahıda 22-ci ölkə oldu.
Qeyd edək ki, “Xəzər Lənkəran”da qol vuran 81 oyunçudan 74-ü Premyer Liqa matçlarında fərqlənib.
