“Xəzər Lənkəran” “Malaqa”nın futbolçusunu rəsmən transfer etdi

Bu gün “Xəzər Lənkəran” növbəti transferini rəsmiləşdirib.

Korner.az-ın klubun rəsmi saytına istinadən məlumatına görə, “ağ-yaşıllar” ispan futbolçu Alvaro Silva Linareslə 1,5 illik müqavilə imzalayıb. 28 yaşlı Alvaro Anatalyada komandanın düşərgəsinə baxışa gələn ilk futbolçulardandı. Bu müddət ərzində keçirilən məşqlərdə və onun iştirak etdiyi 1 yoldaşlıq oyununda ispan futbolçu özünü kifayət qədər etibarlı müdafiəçi kimi göstərə bilib.

Linares mərkəz müdafiəçisi mövqeyində oynayır. O, 2006-2009-cu illərdə İspaniyanın “Malaqa”, daha sonra icarə əsasında “Xerez”də, 2009-2011-ci illərdə İspaniyanın “Kadiz”də və 2011-2012-ci illərdə Rumıniyanın “Petrolul” klubunda oynayıb. Alvaro Silva Linaresin son çıxış etdiyi klub İspaniyanın “Xerez” klubu olub.

Qeyd edək ki, “Xəzər Lənkəran” qış fasiləsində Silvadan öncə Azərbaycan millisin üzvü Uğur Pamuk, türkiyəli Gökhan Güləç və xorvatiyalı Marin Orsuliçlə də müqavilə imzalayıb.