“Rəvan” sabah Topaz Premyer Liqasının final mərhələsi çərçivəsində ilk oyununa çıxacaq.
Korner.az-ın klubun rəsmi saytına istinadən məlumatına görə, “uçan aslanlar”ın XXIII turdakı rəqibi “Xəzər Lənkəran” olacaq. O komanda ki, onlar son 2 həftə ərzində 3-cü dəfə üz-üzə gələcək.
Belə ki, “Rəvan” fevralın 27-də və martın 7-də Azərbaycan kubokunun 1/4 final mərhələsi çərçivəsində bu rəqiblə qarşılaşmışdı. Hər iki oyunda uduzan “Rəvan” isə mübarizəni dayandırmalı olmuşdu. Elə isə bu yenilginin revanşını almağın vaxtıdır.
Özü də nəzərə alaq ki, “Rəvan” heç vaxt qalib gəlmədiyi rəqiblə qarşılaşacaq. Maraqlıdır ki, komandalar arasında baş tutan ilk 3 qarşılaşma heç-heçə başa çatsa da, kubok da daxil olmaqla “uçan aslanlar” son 3 görüşdə bu rəqibə uduzub. Digər tərəfdən, “Rəvan” çempionatda evdə “Xəzər Lənkəran”a məğlub olmayıb: hər iki oyun 1:1 hesabı ilə başa çatıb.
Komandaların indiyə qədər ölkə çempionatında 4 dəfə üz-üzə gəldiyini və yalnız 1 oyunun heç-heçə başa çatmadığını da bildirək. Ümumi statistika belədir: +0=3-1, top fərqi – 3:7.
27.08.2011 “Rəvan” – “Xəzər Lənkəran” 1:1
19.11.2011 “Xəzər Lənkəran” – “Rəvan” 1:1
05.08.2012 “Rəvan” – “Xəzər Lənkəran” 1:1
04.11.2012 “Xəzər Lənkəran” – “Rəvan” 4:0
