Azərbaycan teleməkanının populyar futbol proqramlarından olan “TOP TOP”un növbəti buraxılışı efirə gedib.
Korner.az-ın məlumatına görə, verilişin aparıcısı Elçin Cəfərovun bu dəfəki qonaqları beynəlxalq dərəcəli hakim İmanxan Sultani, “sport7.az” saytının əməkdaşı Səbuhi Musayev və Zaqatalının “Simurq” klubunun azarkeşi İnqilab Soltanov olub. “TOP TOP”da Azərbaycan Premyer liqa oyunlarından, ölkə kubokunun yarımfinal mərhələsinin cavab görüşlərindən və bu matçlarda baş verən kobud hakim səhvlərindən danışılıb. Azarkeş İnqilab Soltanov isə AFFA Hakimlər Komitəsinin rəhbəri Xaqani Məmmədovun ünvanına sərt fikirlər səsləndirib: “Xaqani bəyəm 70 yaşına qədər bu vəzifədə işləyəcək. Atasından qalıb ona bu iş, yoxsa babasından. İndi iş üçün harasa gedəndə, eşidəndə ki yaşın 45-dən yuxarıdır, heç kim sənə iş vermir. Amma Xaqani Məmmədov 45 ildir ki, AFFA-da işləyir. Çıx get də! Bəsdir də Azərbaycan futbolunun başına bu qədər oyun açdın”-deyə tanınmış azarkeş bildirib. Bundan da başqa da “TOP TOP” verilişində şok faktlar açıqlanıb. Bir sözlə baxmağa dəyər.
Qeyd edək ki, “TOP TOP” verilişi hər həftənin bazar ertəsi saat 20:00-da “CHATBOX” kanalında canlı yayımlanır. “CHATBOX” kanalını KATV kabel televiziyası şəbəkəsində və myvideo.az saytında izləmək olar. Proqramın aprelin 27-də efirə gedən buraxılışının videoyazısını təqdim edirik:
