“İnter”in 2012/13-cü il mövsümündəki statistik göstəricilərilə sizi tanış etməkdə davam edirik.
Korner.az-ın klubun rəsmi saytının istinadən verdiyi xəbərə görə, yekuna həsr olunmuş sonuncu materialda mövsüm ərzində “bankirlər”in rəqibin qapısı qarşısında neçə hücum təşkil etdiyi, topa sahib olma və digər statistik göstəricilər haqqında danışılacaq.
“İnter” mövsüm ərzində 38 qol vurub. Vurulmuş 38 topdan 10-nu oyunların 45-60 dəqiqələrdə olub, 7 dəfə paytaxt təmsilçisi 75-90 dəqiqələr arasında fərqlənib, 6 dəfə futbolçular matçların 30-45 dəqiqələrində rəqibin qapısına yol tapıblar. 1-15, 15-30 və 60-75 dəqiqələrdə “İnter” hərəyə 5 qola imza atıb. Çempionat ərzində komanda qapısında 22 qol görüb. Ən çox- 4 qol, “İnter” 30-45 və 45-60 dəqiqələrdə buraxıb.
Vurulmuş 38 qoldan 15-i mərkəzdən təşkil olunmuş hücumlardan sonra baş tutub, 11 top sol cinahdan təşkil olunmuş hücumlardan sonra qeydə alınıb, 6 qol sol cinahdan təşkil edilmiş hücumlardan sonra qeydə alınıb. Qalan 6 qol standart vəziyyətlərdən sonra vurulub: 1 dəfə küncdən zərbədən sonra, 2 dəfə onbirmetrlik cərimə zərbəsindən sonra və 3 dəfə cərimə zərbəsindən edilən ötürmələrdən sonra.
Ümumiyətlə, mövsüm ərzində komanda mərkəzdən 959 hücum təşkil edib, 746 dəfə “İnter” sağ cinahla hücuma keçirdi və 652 dəfə sol cihadan hücumlar təşkil edirdi. Premyer Liqanın 2-ci turunda “Qəbələ”yə qarşı keçirilmiş səfər oyununda “İnter” mövsümdə topa sahib olmaqda özünə məxsus ən yaxşı nəticəsini göstərib. Bu matçın vaxtının 68 %-ni komanda topla keçirib. Topa sahib olmaqda ən pis göstərici “Kəpəz”ə qarşı baş tutmuş səfər oyununun payına düşür. Həmin qarşılaşmada “İnter” vaxtın yalnız 42 %-nı topla keçirib.
Turnirin 27-ci turunda “Simurq”a qarşı keçirilmiş oyunda komanda mövsüm ərzində bir matçda ən çox zərbə endirıb. Həmin qarşılaşmada “İnter” rəqibin qapısına 25 zərbə endirib ki, bu zərbələrin 5-i qolla nəticələnib. Ən az zərbə isə Kaxaber Sxadadzenin yetirmələri çempionatın 21-ci turu çərçivəsində “Neftçi”yə qarşı keçirilmiş səfər oyununda endiriblər- cəmi 4 zərbə.
“İnter”in futbolçuları bir oyun ərzində ən çox ötürmə (737) “Simurq”a qarşı baş tutmuş 9-cu turun görüşündə ediblər. Ən az ötürmə klubun oyunçuları “Xəzər Lənkəran” komandasına qarşı keçirilmiş 19-cu turun görüşündə qeydə alınıb. Həmin görüşdə komandanın futbolçuları cəmi 417 ötürmə ediblər.
