“Xəzər Lənkəran”dan daha bir açıqlama: “Bizə belə azarkeşlər lazım deyil”

"Green Gate 2" fan qrupunun 5 üzvünün "Xəzər Lənkəran" – "İnter" oyunundan sonra həbs edilməsi və bu azarkeşlərə 3 sutkalıq həbs verilməsi haqda sizə xəbər vermişdik.

Korner.az məsələni gündəmdə saxlayır və klubun icraçı-direktoru Höccət Hacıyev məsələ ilə bağlı maraqlı açıqlama verib.

Hacıyev saytımıza bildirib ki, həmin saxlanılan azarkeşlər xuliqanlıq etdiyinə görə həbs ediliblər və klub bu yöndə hər hansı tədbir görməyə hazırlaşmır:

"Həmin azarkeşlər komandamız məğlub durumda ikən fakel yandırdılar. Az qala stadionu yandıracaqdılar. Polis bu azarkeşləri keçən dəfə də xuliqanlığa görə bölməyə aparmışdı və mən gedib onları çıxartdım ordan. Bİzə, ümumiyyətlə, heç bir kluba ona ziyan yetirəcək, xuliqan azarkeş lazım deyil. Onlar həmişə bizə problem yaradır. "Xəzər Lənkəran" həmişə azarkeşlərinin arxasındadı. Yenə onların polis bölməsinə aparılması artıq onların necə bir fanat olduğundan xəbər verir. Biz polisə gedib müraciət etdikdə onlar bizə deyirlər ki, "daha bizi niyə gətirirsiz stadiona?". Polislər asayişi qoruyur. Qayda pozuntusu edən hər kəs cəzalandırılır. Həmin azarkeşlər bizə ancaq ziyan vurur".