Premyer Liqanın XXXII turunun “Qarabağ”la oyununda 4:1 hesablı qələbə qazanan “Xəzər Lənkəran”ın 2 futbolçusu üçün qarşılaşma əlamətdar olub.
Korner.az-ın klubun saytına istinadən yaydığı məlumata görə, malili futbolçu Sadio Tounkara və kosta-rikalı futbolçu Rendall Brenes Premyer Liqada qol hesablarını açıblar. Bu matçadək 64 futbolçu Premyer Liqa görüşlərində “Xəzər Lənkəran” üçün qol vurmuşdu. Qış transferlərimiz bu sayı 66-ya çatdırdı.
Çempionatdan fərqli kubokda qol sevinci yaşamış Brenes “Xəzər Lənkəran” formasında əvvəl də qol vurub. Sadio isə ümumilikdə ilk dəfə qol sevinci yaşadı. O, həm də Azərbaycanda malililərin ilk qolunun müəllifi oldu. Təbii ki, əvəzedicilərin çempionatı nəzərə alınmamaqla. Tounkara “Xəzər Lənkəran” formasında qol sevinci yaşayan ümumilikdə 72-ci futbolçudur.
Bu 72 futbolçudan 46-sı legionerdir. Sadioya qədər “Xəzər Lənkəran”ın heyətində 12 rumıniyalı, 7 braziliyalı, 4 türkiyəli, bolqarıstanlı, 3 portuqaliyalı, 2 albaniyalı, kosta-rikalı, serbiyalı, 1 argentinalı, fransalı, kolumbiyalı, honduraslı, moldovalı, nigeriyalı, fil dişi sahilili, sloveniyalı və syerra-leoneli qol vurub.
