“Xəzər Lənkəran” daha bir futbolçunun transferini rəsmiləşdirib.
Korner.az-ın məlumatına əsasən, ispaniyalı Eduard Oriol Qrasiya bu gün cənub klubu ilə 2 illik müqavilə bağlayıb.
26 yaşlı yarımmüdafiəçi karyerasına Kataloniyanın “Pobla Mafumet” klubunda başlayıb. Ardından bu bölgənin digər komandası “Sant Andreu”ya keçən Eduard bir mövsüm bu komandada oynayıb.
Həmin mövsümü olduqca uğurlu keçirən futbolçu “Barselona”nın diqqətini cəlb edib. 2009-2011-ci illərdə “Barselona B”də oynayan Edu bu komandanın “Sequnda”ya vəsiqə qazanmasında əsas rol oynayanlardan biri olub.
Bir neçə dəfə “Barselona”nın əsas komandasının heyətinə də cəlb olunan oyunçu, ümumilikdə İspaniyanın ikinci divizionu olan “Sequnda”da 60 çempionat oyununda 9 dəfə fərqlənib.
2011-ci ildə isə sol cinah yarımmüdafiəçisi olan Oriol “La Liqa”da çıxış edən “Real Saraqosa”ya keçib. Burada üst-üstə 45 oyun keçirən futbolçu bu gündən etibarən “Xəzər Lənkəran”ın uğurları üçün çalışacaq.
