Visente Qomes: “Hər şey planlaşdırdığım kimi gedir”
14.01.2021 , 23:25
“Hazırda hər şey planlaşdırdığımız kimi gedir. Əsas odur ki, komandada zədəlilər olmasın və oyunçularımız məşqlərinə problemsiz davam edə bilsinlər”.
Korner.az xəbər verir ki, bu sözləri “Sabah”ın baş məşqçisi Visente Qomes bu gün “Səbail”lə keçirilən yoxlama matçından sonra klubun rəsmi saytına açıqlamasında deyib.
İspaniyalı mütəxəssis 1:0 hesabı ilə qalib gəldikləri görüş haqda bunları bildirib: “Bu gün hazırlıq çərçivəsində yoxlama oyununda qüvvəmizi sınadıq. Qalib gəlmək həmişə yaxşıdır, lakin, anlamalıyıq ki, bu gün sərgilədiyimiz oyun turnir cədvəlindəki mövqeyimizi daha da yaxşılaşdırmaq üçün kifayət deyil”.
“Səbail”lə yoxlama oyunu “Sabah”ın yeni transferi Tiemoko Fofana üçün əlamətdar olub. Gənc hücumçu “göy-ağ” formada ilk oyununu keçirib. Qomes onun oyununu da dəyərləndirib:
“Fofana komanda ilə cəmi iki məşqə çıxdıqdan sonra ilk oyununu keçirdi. Bu matçda meydanda yaxşı çalışdı. Ondan daha çox şey gözləyirik. Məşqlərlə və oyun praktikası ilə istədiyimiz oyun ideyasına, tərzinə vaxt keçdikcə uyğunlaşacaqdır”.
Xatırladaq ki, “Sabah” qış fasiləsindən sonra Azərbaycan Premyer Liqasında ilk oyununu yanvarın 21-də saat 18:00-da, “Bank Respublika Arena”da “Qarabağ”a qarşı keçirəcək.
