AZAL-dan ayrılaraq, "Bakı" ilə razılığa gələn Aqil Nəbiyev mətbuata verdiyi açıqlamalarda Vaqif Sadıqovun yerli futbolçulara güvənmədiyini və daha çox legionerlərə bel bağlamasını bildirir.
Bu iddiaları AZAL-ın baş məşqçisi Vaqif Sadıqov isə yalanlayıb.
Təcrübəli mütəxəssis Korner.az-a verdiyi açıqlamada bu iddialara belə fikir bildirib:
"Mən hazır olan hər futbolçunu meydana buraxıram. Aqil təcrübəli futbolçudu. O, komandanın kapitanı idi. Mən fikirləşirdim ki, onu kubok oyununda meydana buraxım. O, zədədən sonra əsas heyətdə forma şansını itirsə də, mən klub rəhbərliyi ilə birgə söhbətimizdən sonra, onun komanda üçün gördüyü işləri nəzərə alıb kubok oyununda meydana buraxmağı istəyirdim. Ancaq belə oldu ki, o getməyi seçdi. Səbr etsə idi mən ona yenə əsas heyətdə güvənə bilərdim. Aqil peşəkar futbolçudu. Mən deyə bilmərəm ki, onu nə vadar edir belə fikirlər səsləndirməyə. Lakin ona qarşıdakı karyerasında uğurlar arzu edirəm".
