Maltanın “Valletta” klubunun baş məşqçisi Qilbert Aqius Çempionlar Liqasının II təsnifat mərhələsinin “Qarabağ”la cavab oyunu öncəsi mətbuatla fikirlərini bölüşüb.
Korner.az-ın məlumatına görə, Aqius komanda qüruru uğrunda savaşacaq:
"Güclü bir komandaya qarşı oynayacağımızı bilirik. “Qarabağ”ın ötən illərdə də Avroliqada yaxşı nəticə göstərdiyi məlumdu. Rəqibə olan hörmətə rəğmən qürurumuz üçün savaşacağıq".
Gənc məşqçi oyunun çətinliyi xüsusi qeyd edib:
“Valletta”da məşqçi kimi ilk oyunlarımı keçirirəm. Futbolçular dediyim tapşırıqların öhdəsindən gəlsələr, yaxşı nəticə qazanacağımıza inanıram. Mənim üçün yaxşı oyun əsasdır, nəticə önəmli deyil. Heç vaxt bədbin olmamışıq. “Qarabağ”a təslim olmaq fikrimiz yoxdur. İlk oyunda qapıçımız yaxşı qurtarışlar etdi. Ancaq oyunun qəhramanı təkcə o deyildi. İnanıram ki, sabahkı oyunda qapıçımızın üzərinə çox iş düşməyəcək. Vətənə yaxşı nəticə ilə qayıdacağımıza ümid edirik”.
Qeyd edək ki, "Qarabağ" – "Valletta" matçı sabah Tofiq Bəhrəmov adına Respublika stadionunda keçiriləcək.