Ukraynalı istedad “Liverpul” akademiyasına cəlb olundu
29.12.2025 , 11:10
Ukrayna millisinin U-15 komandasında çıxış edən perspektivli yarımmüdafiəçi Miroslav Vaskovski karyerasında yeni mərhələyə qədəm qoyub.
Korner.az xarici KİV-ə istinadən xəbər verir ki, 14 yaşlı futbolçu bundan sonra “Liverpul”un sistemində inkişaf edəcək.
Mersisayd təmsilçisi gənc oyunçunun transferini rəsmi şəkildə təsdiqləyib. Vaskovski İngiltərə klubuna Avstriyanın “Austriya” kollektivindən keçib. Onun futbolçu kimi formalaşmasında Kiyevin “Lokomotiv” klubunun xüsusi rolu olub.
“Liverpul” rəsmi açıqlamasında gənc yarımmüdafiəçini “Xoş gəldin, Miroslav!” sözləri ilə təqdim edib. Bildirilir ki, futbolçu 2022-ci ildən etibarən “Austriya”nın sıralarında yer alırdı, 2025-ci ilin iyulundan isə “qırmızılar”ın akademiyasında məşqlərə başlayıb. Transferlə bağlı bütün hüquqi məsələlər dekabrın sonlarında yekunlaşdırılıb.
Qeyd edək ki, Vaskovski dekabr ayında Portuqaliyada təşkil olunan UEFA İnkişaf Turnirində iştirak etmək üçün Ukraynanın U-15 yığmasına davət alıb.
