UEFA-nın 2008-13-cü illəri əhatə edən reytinq siyahısında dəyişikliklər olub. Korner.az-ın məlumatına görə, 2012/13 mövsümünün Çempionlar Liqasının II təsnifat mərhələsinin baş tutan oyunlarından sonra UEFA ölkələri xal hesablarını dəyişə bilib.
Son 5 mövsümü əhatə edən reytinqə Azərbaycan da hesabına daha 0,250 xal əlavə edib. Bu, “Neftçi”nin Çempionlar Liqasının II təsnifat mərhələsində Gürcüstan “Zestafoni”sini udması hesabına mümkün olub. 3:0 hesablı qələbə hesabımıza 0,250 xal gətirib.
Bununla da cari mövsüm yığılan xallarımızın sayı 1,250-yə çatdı. Bunun ən böyük hissəsini – 0,500-ü “İnter”ın payına düşür. “Xəzər Lənkəran” 0,375, “Neftçi” 0,250, “Bakı” isə cəmi 0,125 xal qazanıb.
Bu isə ölkəmizin reytinqini 6,791-ə çatmasına imkan verib. Lakin ölkəmizin mövqeyi dəyişməz qalıb. Hərçənd 35-ci olan Azərbaycan özündən irəlidəki İrlandiyanı arxada qoymağa yaxın idi. Lakin “Şemrok Rovers” heç-heçə etməklə Azərbaycanın irəliləməsinə əngəl olub.
UEFA reytinqinin 4-cü onluğu
31 Finlandiya 7.508
32 Sloveniya 7.333
33 Bosniya-Herseqovina 7.208
34 İrlandiya 6.875
35 Azərbaycan 6.791
36 Moldova 6.541
37 Litva 6.000
38 Qazaxıstan 5.458
39 İslandiya 5.291
40 Latviya 5.291
apasport.az