“Makkabi”yə biabırçı məğlubiyyətlə bağlı müzakirələr hələ də davam edir.
Korner.az-ın məlumatına görə, məsələ ilə bağlı hər gün müxtəlif fikirlər ortaya çıxır: “torba”, “istefa”, “qeyri-peşəkar idarəetmə”.
Ancaq biz suallarımıza klubun vitse-prezidenti Tuyqun Nadirova verərək, hər şeyə onun öz dilindən aydınlıq gətirmək istədik. Vitse-prezident kifayət qədər maraqlı məqamlara toxundu: “Burda bir səbəb demək olmaz. Hələ heç kim əsas səbəbin nə olduğunu bilmir. Bu araşdrılıb, 1-2 günə konkret səbəb deyiləcək. Səbəblərdən birinə görə, elə 4 nəfər komandadan uzaqlaşdırılıb. Əlavə göndərilənlər olacaqmı? Buna rəhbərliyin nəzarəti altında məşqçilər korpusu qərar verəcək. Bu barədə qəti ölçülər götürüləcək. Artıq islahatlar başlayıb”.
Amma Nadirov problemin sadəcə 4 futbolçudan qaynaqlandığını söyləmədi. Onun fikrincə, burda meydandan kənar amillər də böyük rol oynadı: “Böyükhesablı məğlubiyyəti bir səbəb, bir məsələ ilə bağlamaq olmaz. Orda başqa amillər də var. Hamısı üst-üstə yığıldı ki, sonda bu cür nəticə qeydə alındı. Bundan əvvəl olub ki, gedib səfərdə 1:3 uduzmuşuq, amma evdə heç-heçə eləmişik. Açıq-aydın görünür ki, bu, futbol qayda-qanunlarına əsasən hesaba alınmayıb. Məğlubiyyətdə, futboldankənar səbəblər var. Bu səbəblər də araşdırılır. İlk addımlardı ki, 4 nəfər komandadan uzaqlaşdırılıb. Əlavə tədbirlər də görüləcək və hamısı açıqlanacaq. Oyuna baxanda da görünürdü ki, bəzi futbolçular öz peşəkarlıq səviyyələrindən aşağı çıxış elədi. Hazırda məsələ rəhbərliyin nəzarəti altında məşqçilər korpusu tərəfindən araşdırılır”.
Mətbuatda komandanın rəisi Səməd Mustafayevin bəzi futbolçularla əlbir olub Toşaka “torba tikmək” istəyi ilə bağlı xəbərlər dolaşır. Böyükhesablı məğlubiyyətin də məhz bu şəxs tərəfindən planlaşdırıldığı söylənilir. Nadirov isə bunu bəzi insanların uydurması kimi dəyərləndirdi: “Kimsə ortada xəbər dolaşdırır, nə bilim rəhbəlik belə getdi, filankəs belə gəldi. Rəhbərlik gecə-gündüz futbolçulara lazımı şərait qurmaqla məşğuldu. Azərbaycanda təşkilatlanma baxımından bir nömrəli klub “Xəzər Lənkəran”dı. Burda klubun idarə heyətinin üzvlərinin rolu böyükdü. İstər səfər, istərsə ev oyununda bu klubun ofisindən tutmuş stadionun hər bir əməkdaşına kimi hər birinin əziyyəti var. Amma futbolçuların yaramaz oyunu əziyyəti vurdu yerə”.
sportinfo.az
