Bakıda keçiriləcək Şahmat Olimpiadasının başlanmasına bir neçə gün vaxt qalır. Paytaxtımıza 187 ölkənin şahmatçıları gələcək.
Türkiyə komandasının üzvü Mustafa Yılmaz (2621 reytinq) olimpiada gözləntilərini korner.az saytı ilə bölüşüb
– Bakıdaki olimpiadadan gözləntiləriniz nədi?
Bugünə qədər 4 olimpiadada oynamışam. Bakıdaki yarışmanın bunların hamısından daha yaxşı təşkil olunacağına ümid edirəm. Turnirin keçirildiyi yerin çox gözəl olduğunu bilirəm. Özəl bir yerdə oynayacağıq. Promlemsiz bir olimpiada gözləyirəm.
– Olimpiadanın qardaş ölkədə olması sizin üçün üstünlük olacaqmı?
– Bəli. Azərbaycanda hər kəslə eyni dildə danışacağıq. Bu çox gözəldi. Mənim həyat yoldaşım da azərbaycanlıdı. Buna görə də Bakıda yadlıq hiss etməyəcəm.
– Olimpiadadan Türkiyə yığması adına gözləntiləriniz nədi?
– Komandamız ilk "onluğ”a düşsə, super olar. Amma daha realist olsaq, ilk "iyirmilik”də bitirsək də, pis nəticə sayılmaz. Şəxsi hədəfim komandaya maksimum faydalı olmaq və reytinqimi 10-15 xal artırmaqdı.
– Sizcə, olimpiadanın favorit komandaları kimdi?
– Güclü komandalar çoxdu. Məncə, Amerika, Çin və Azərbaycan – bu komandalardan biri çempion ola bilər.
– Komandanızın olimpiadaya hazırlıqları necədi?
– Milli komandamız bu il iki dəfə təlim-məşq toplanışında olub. Bunun da kifayət qədər olduğunu düşünmürəm. Çünki bizim komandadaki iştirakçıların, mən də daxil olmaqla, əksəriyyəti həm də məşqçilik edir.
– Bakıya nə zaman gələcəksiniz?
– Avqustun 30-da Bakıya gəlməyi düşünürük. Bir neçə gün dincəmək yaxşı olar.
– Qadın milli komandanız necə, onların hazırlığı hansı vəziyyətdədi?
– Qadınların bizdən də hazırlıqsız olduğunu düşünürəm. Yekaterina Atalıkın komandaya dönməsi ilə ilk “on beşliy”ə düşməkləri uğur hesab edilə bilər. Yenə də qadın milli komandamızın məşqçisi bu suala fərqli cavab verə bilər.
– Federasiyanız sizdən çempionluq gözləmir. Bu amilə görə siz daha rahat, arxayın çıxış edəcəksiz?
– Çempionluq gözləmək doğru olmaz. Çünki Türkiyədə şahmat mədəniyyəti yox idi və yeni yaranmağa başlayıb. Federasiya ilk “iyirmilik”də bitirməmizi gözləyir. Amma yenə də onların hədəfi mənim üzərimdə təzyiq yaratmır.
Məmmədov İlkin
Korner.az
Layihə AFFA yanında Media Komitəsi tərəfindən maliyyələşdirilir
