1997-1999-cu illərdə “Beşiktaş”ı çalışdırmış, 2 dəfə Madrid “Real”ına baş məşqçilik etmiş, ötən həftə isə “Xəzər Lənkəran”la anlaşmış Con Benjamin Toşak Türkiyənin “NTV Spor” telekanalına danışıb.
Korner.az-ın məlumatına görə, uelsli çalışdırıcı türk klublarının avrokubok şanslarını dəyərləndirib.
“Real” (Madrid) “Barselona”yla birlikdə Çempionlar Liqasının favoriti idi” – deyən Toşak “Qalatasaray”ın ünvanına xoş ifadələr səsləndirib: “Fatih Terim və komandası 1/4 finala yüksəlməklə çox bpyük iş görmüş oldular. “Qalatasaray” “Malaqa”yla birlikdə bu mərhələyə çıxan iki sürpriz komandadan biri oldu. “Cim Bom”a uğurlar arzulayıram, amma onlar üçün çox çətin bir mərhələ olacaq. “Real”da Ronaldo, Xabi Alonso, Kasillas, Ramos kimi önəmli oyunçular var. Ancaq İstanbula gəlib “Qalatasaray”la oynamaq heç bir komanda üçün, heç vaxt asan olmayıb. Hərçənd, əminəm ki, Maurinyo bu püşktdən məmnundu. Çünki “Barselona” və “Bavariya”dan “qaçdı”. Ancaq o da bilir ki, “Qalatasaray”a uduzsa, başına böyük bəla açmış olacaq”.
Toşak “Fənərbağça”nın Avroliqada irəliləmək şanslarını da dəyərləndirib: “Maraqlı təsadüfdü, “Fənərbağça” Avropadakı son matçını azarkeşsiz oynamışdı, indi də İtaliyada azarkeşsiz oynayacaq. Bu gedişlə “Fənər”in oyunlarını tribunadan izləmək heç kimə qismət olmayacaq. Bu cür oyunlar çox çətin olur. Amma mərhələ adlamaq üçün “Fənər”in şansı yüksəkdi. İki komandasının yarımfinala çıxması Türkiyə futbolu üçün möhtəşəm olacaq”.
Açıqlamasında “Beşiktaş”da keçirdiyi günlərdən də danışan uelsli çalışdırıcı sabiq komandasına məsləhət verməyi də unutmayıb: “Beşiktaş”da gözəl günlər keçirdim. Ancaq dürüst olmaq lazımdı, artıq bu komandanın oyunlarını çox izləyə bilmirəm. Avropada bir çox klubun maddi problemleri var. Qısa müddət əvvələ qədər “Qalatasaray”ın da vardı, bəlkə “Fənərbağça”nın da var. “Beşiktaş” gənc oyunçular yetirərək bu vəziyyətdən qurtula bilər. Keçən həftə Nihat Kahveciylə danışdım. “Vilyareal”ın aşağı yaş qrupu üzrə komandasında məşqçidi. “Beşiktaş”dakı günlərimizdən danışdıq. Yasin Sülün, Sərdar Topraktəpə, Fevzi Tuncay kimi bir çox gənc oyunçumuz vardı. “Beşiktaş”ın indiki yolu da bu olmalıdı".
