Tomas Doll: “Sabahkı matçdan sonra gülən mən olacam”
23.10.2019 , 19:03
Avropa Liqasının qrup mərhələsinin III turunda sabah “Qarabağ”ın qonağı olacaq Kiprin APOEL klubunun baş məşqçisi Tomas Doll oyunöncəsi mətbuat konfransında jurnalistlərin suallarını cavablandırıb.
– İki ay əvvəl də bu masa arxasında əyləşmişdiz. Keçən zaman ərzində nələr dəyişib?
– Həmin matç da indiki kimi final əhəmiyyəti daşıyırdı. Bizim xallara ehtiyacımız var və nə etməli olduğumuzu bilirik. Sadəcə, taktiki olaraq düzgün oynamaq yox, eyni zamanda meydanda ürəyimizi qoymalı və həvəslə mübarizə aparmalıyıq. Son matçda stadion çox səs-küylü idi. Azarkeşlərin çoxluğu futbolun gözəlliyidi. Biz bura lazımlı xalları qazanmağa gəlmişik.
– “Qarabağ”ın hansı cəhətləri sizin başınızı ağrıda bilər?
– Mənim heç vaxt başım ağrımır. Matçın əhəmiyyətini bilirik və çox yaxşı hazırlaşmışıq. Avrokubokda oynamaq hər bir klub üçün çox gözəldi. Biz mental olaraq hazırıq və nə etmək istədiyimizi bilirik. Sabah yaxşı performans göstərməliyik. “Qarabağ”la son matçımızda bunu etdik və lazım olan anda lazımlı qolları vurduq. Sabah üçün də dəqiq planımız olmalıdı. Çox təcrübəli futbolçularımız var. Onlar nə etməli olduqlarını bilirlər.
– Avqustdakı səfəriniz zamanı çox şən görünürdüz, ancaq indi qayğılısız…
– Uzun yol gəlmişik. Buna görə yorğunluq var. Oyunla bağlı bir şey yoxdu. Sabahkı matçdan sonra gülən mən olacam (gülür).
– Sabahkı mümkün məğlubiyyət artıq APOEL üçün mübarizənin bitdiyi anlamına gələcəkmi?
– Heç bir işə başlamazdan əvvəl neqativ düşünmək olmaz. Meydançaya yalnız qələbə haqda düşünərək çıxmalıyıq. Sabahkı matça tam hazırıq.
– Tomas de Vinsentinin yoxluğu çox ciddi itkidi, yoxsa onu əvəz edə biləcək futbolçularınız var?
– Onun bizimlə olmaması itkidi. Ancaq onu əvəzləyə biləcək yaxşı futbolçularımız Var. Sabah meydana onun üçün də çıxacağıq. Başqa hər hansı itki yoxdu. Bütün futbolçularımız hazırdı.
