Ter Ştegen mövsümün sonunadək “Jirona”da
20.01.2026 , 12:30
“Barselona”nın qapıçısı Mark-Andre ter Ştegen yaxın vaxtlarda komandasını dəyişə bilər.
Korner.az xarici KİV-ə istinadən xəbər verir ki, Kataloniya təmsilçisi ilə “Jirona” arasında alman qolkiperin mövsümün sonunadək icarəyə verilməsi barədə razılıq əldə olunub. Müqavilənin 30 iyun tarixinə qədər qüvvədə olacağı bildirilir və hazırda yalnız rəsmi sənədlərin imzalanması prosesi qalır.
Bildirilir ki, gözlənilməz bir maneə çıxmasa, Ter Ştegen La Liqanın 21-ci turunda “Xetafe” ilə 27 yanvarda keçiriləcək oyunda “Jirona” forması ilə meydana çıxa bilər. Transferin riskə düşməməsi üçün qapıçının “Barselona”nın Çempionlar Liqasında “Slaviya” (Praqa) ilə matç üçün heyətə salınmaması da istisna edilmir.
Qeyd olunur ki, icarə müddəti ərzində Ter Ştegenin maaşının əsas hissəsini “Barselona” qarşılayacaq. Buna səbəb “Jirona” klubunun qapıçının illik 17 milyon avroluq məvacibini tam ödəməkdə çətinlik çəkməsidir.
