“Bir müddətdir ki, danışıqlar aparırdıq. Oyundan əvvəl isə transfer rəsmiləşdi”.
Bu sözləri Norveç millisinin futbolçusu Tarik Elyunussi söyləyib. “Olimpiakos”dan “Qarabağ”a icarəyə verilən yarımmüdafiəçi DÇ-2018-in seçmə mərhələsində yığmamızla matçdan əvvəl “Qarabağ”ın futbolçularının ona isti münasibət bəslədiyini bildirib:
“Bu keçiddən “Qarabağ”ın futbolçularının da məlumatı var idi. Çünki onlar mənə qarşı isti münasibət göstərdilər. Yaxşı insanlara oxşayırdılar. Hər birinə təşəkkür etdim”.
29 yaşlı oyunçu “Qarabağ”a keçidinin oyundan əvvəl rəsmiləşdiyini söyləyib:
“Azərbaycanla matç başlamamışdan əvvəl danışıqlar gedirdi. “Qarabağ”a keçəcəyimdən tam əmin deyildim. Paltardəyişmə otağını tərk edəndə telefonumu söndürüb ora qoydum. Qarşılaşma başa çatandan sonra isə transferin rəsmiləşdiyini gördüm. Bu, mənim üçün maraqlı olacaq. Çempionlar Liqasında oynamaq hər oyunçunun arzusudur. İnanıram ki, karyeram Azərbaycanda uğurlu olacaq. Yeni ölkə və yeni mədəniyyətlə tanış olacam. Əvvələr bir neçə dəfə Bakıda olmuşam. Çox gözəl şəhərdir”.
