Bu gün ÇL-in II turunda "Dalğa Arena"da "Zestafoni"ni qəbul edəcək "Neftçi"nin vitse-prezidenti Tahir Süleymanov oyunla bağlı fikirlərini Korner.az-a bölüşüb.
İlk növbədə bütün "Neftçi"sevərləri və azarkeşləri stadiona dəvət edən Süleymanov, qələbə qazanacaqlarına inandığını bildirib:
"İnanıram ki, gözəl oyun olacaq. "Neftçi" lazımi qələbəni qazanacaq. Futbolçularımıza inanırıq. Onlar da bu oyuna böyük əzmlə hazırlaşırlar. Əlbəttə, "Zestafoni" 2 qat Gürcüstan çempionudur. Lakin yəni elə də zəif komanda deyil. Bütün bunlara baxmayaraq, "Neftçi" qələbə haqda düşünür. İnanıram ki, uşaqlar bu işin öhtəsindən layiqincə gələcəklər".
Oyunla bağlı proqnoz vermək istəmədiyini vurğulan "Neftçi" rəsmisi sonda bunları dedi:
"Proqnoz vermirik. Hər şey 90 dəqiqədən sonra məlum olacaq. Bilirsiz, komandamız hər zaman qitə miqyaslı yarışlarda güclü komandalara qarşı mübarizə aparıb. Ən əsası odur ki, hesabdan asılı olmayaraq azarkeşlərimiz bizi sona qədər dəstəkləsinlər. İnanırıq ki, belə də olacaq. Tribunalar ağzına qədər dolmalıdır".
