Tərlan Əhmədov: “Onun potensialına bələdəm”
26.10.2019 , 20:21
“Keşlə”nin baş məşqçisi Tərlan Əhmədov Azərbaycan Premyer Liqasının 9-cu turunda “Qəbələ” 2:1 hesabı ilə qalib gəldikləri oyundan sonra jurnalistlərin suallarını cavablandırıb.
Korner.az xəbər verir ki, mütəxəssis əvvəlcə qələbəni şərh edib:
– Hər oyunda çoxlu qol epizodları yaradırıq, amma onların azından istifadə edirik. Bu matçda da elə oldu. Qələbə istəyi ilk yarıda daha çox idi. İkinci hissənin əvvəlində də bir neçə epizodda yaxşı imkanlar yaxaladıqdan sonra uşaqlarda arxayınlıq yarandı. Məğlub da ola bilərdik. “Qəbələ” yaxşı komandadı. Elmar Baxşıyevlə Azər Bağırova uğurlar arzulayıram. Qısa zamanda yaxşı komanda yaradıblar. Belə bir rəqiblə oyunda vacib 3 xal qazandıq. Futbolçularımı təbrik edirəm. Qarşıdakı oyuna daha ciddi hazırlaşmalıyıq. Bir həftə sonra bizi bundan da ağır matç gözləyir. İki günlük istirahətdən sonra yenidən hazırlığa başlayacağıq.
– Matçboyu Tural Bayramlıya qışqırırdız. Ona alternativ yoxdur? Sağlamlığınız daha önəmli deyil?
– Seçimimiz məhduddu. Limitə düşən futbolçular arasında o, hamıdan yaxşıdı. Tural gənclər yığmasına namizəddi. Onun potensialına bələdəm. Fransadakı məlum olay da ona pis təsir edib. Üstəlik, limitə düşən digər futbolçularımızdan Ziya Əzizovla Ceyhun Muxtarlı uzun müddətə sıradan çıxıb. Ancaq bütün hallarda, sağlamlığım daha önəmlidi. Çünki mənim də ailəm, uşaqlarım var.
– Maraqlıdı ki, ilk dövrədə “Keşlə” əsasən ikinci hissədə parlaq futbol sərgiləyirdi. İkinci dövrədə isə yalnız ilk 45 dəqiqədə bunu müşahidə edirik. Bəs komandanız 90 dəqiqə nə vaxt parlaq oynayacaq?
– 90 dəqiqə eyni səviyyədə oynamaq çətindi. Rəqib komanda da bizim kimi qol vurmaq, qələbə qazanmaq istəyir. Futbolun gözəlliyi də bundadı. Sezar Meza Kolli komandaya gec qoşulub. Hələ tam hazır deyil. 60 dəqiqə oynamağa hazırdı. Ruslan Qurbanovla Əfran İsmayılov da hələ ideal formada deyil. Arxada qalan 9 turda demək olar ki, eyni heyətlə oynayırıq. Rotasiyalar üçün heyətimiz geniş olmalıdı. Bu da günü-gündən futbolçuların yüklənməsini artırır. Kiməsə istirahət verə bilmirəm ki, növbəti oyunlara daha yaxşı hazır olsun.
– Oyundan sonra Zaur Axundovla qısa dialoqunuz oldu və “ok” dediniz. Sirr deyilsə, nə barədə söhbət etdiniz?
– Bu gün futzal üzrə Azərbaycan yığmasının Slovakiya ilə oyunu var. Həmin matçdan sonra isə millimiz üçün banket təşkil olunacaq. “Keşlə” də tam tərkibdə həmin oyuna və banketə dəvət olunub. O barədə danışırdıq.
