Tərlan Əhmədov: “İlk qol oyunun sınma nöqtəsi idi”
05.05.2023 , 23:42
Azərbaycan Premyer Liqasının XXXIII turunun “Kəpəz” – “Sabah” oyunundan (0:3) sonra meydan sahiblərinin baş məşqçisi Tərlan Əhmədovun mətbuat konfransı keçirilib.
Korner.az xəbər verir ki, mütəxəssis məğlubiyyəti belə şərh edib:
“Sabah”ı təbrik edirəm. Layiqli qələbə qazandılar. İlk qolu tez buraxdığımız üçün ritm pozuldu. Ümumillikdə futbolçuların çıxışından narazılığım yoxdur. Onlar bacardıqları qədər mübarizə apardılar. Çalışdıq ki, hücumlar quraq. Mənə dedilər ki, Xvalkonun epizodunda top qapı xəttini keçmişdi. Qol olsaydı, tamamilə fərqli oyun görərdik. Şamaxıda hiss etmişdim ki, komandam yorğunluq fonunda futbol oynayır, geri gedir. Oyunçular sağ olsunlar ki, bu vəziyyətdə, məğlub olmağımıza baxmayaraq baxımlı futbol oynadılar. Komandamız “Sabah”dan çəkinmədi. Topa nəzarət etməyə çalışırdıq, hücumlar qururduq. Rəqibin çempionluğa şansı var. Ona görə də bilirdik ki, gərgin mübarizə olacaq. Məni məyus edən Gəncədən bura gələn fanatların geriyə üzgün halda dönməsidir. Bizə qarşıdakı üç oyunda heç olmasa üç xal lazımdır ki, elitada qala bilək. Futbolçularımdan heç bir narazılığım yoxdur. İlk qol oyunun sınma nöqtəsi idi”.
