Tərlan Əhmədov: “Hücum futboluna görə sevindim”

“Keşlə”nin baş məşqçisi Tərlan Əhmədov Topaz Premyer Liqasının 20-ci turunda “Sabah”a 3:0 hesabı ilə qalib gəldikləri oyunundan sonra mətbuat konfransında fikirlərini bölüşüb.

47 yaşlı mütəxəssis öncə qələbəni şərh edib: “Maraqlı oyun getdi. Hər iki komandanın ifasında qarşılıqlı hücumlar oldu. Bu gün daha istəkli idik və səhv etmədən çıxış etdik. Mübarizəyə, hücum futboluna görə sevindim. Müdafiədə isə demək olar ki, səhvə yol vermədik. İtkilərimiz var idi. Amma meydanda olan futbolçuların çıxışı bizi sevindirdi. Onlara belə oyuna görə təşəkkür edirəm”.

Əhmədov komandasının oyunundan razı qaldığını sözlərinə əlavə edib: “Hər bir komanda rəqibi analiz edir. Həmişə öz komandamın oyununa üstünlük verirəm. Çalışıram ki, hətta məğlub olsaq belə, baxımlı futbol göstərək. Futbolçulara da demişəm ki, uduzsaz belə, çalışın oyununuzdan zövq alın. Komandamın çıxışı məni çox sevindirdi. İstədiyim futbolun 60-70 faizini gördüm”.