Təmkin Xəlilzadə: “Tələsirəm, çünki futbolçu üçün vaxt çox önəmlidi”
06.08.2020 , 17:19
“Sabah”ın müdafiəçisi Təmkin Xəlilzadə “instagram” hesabında 27 yaşının tamam olmasından yazıb.
Korner.az xəbər verir ki, milli üzvü karyerasına da toxunub:
“Hər yaşa dolduqca məsuliyyət çiyinlərimdə bir az daha artır. 27 yaş bəziləri üçün həyata başlanğıc olsa da, mənim üçün kifayət qədər böyük yaşdır. Demək olar ki, karyeramı yarılamışam. Çoxunuz bilirsiniz ki, 20 yaşımda Premyer Liqada “Qarabağ”da debüt etmişəm.
Bu 7 ildə 5 klubda forma geyindim. 7 qolum, 20-dən çox assistim var. 3 dəfə millinin heyətində fərqlənə bilmişəm. Amma mənim üçün hələ azdır. Qarşıda böyük hədəflərim var. Tələsirəm, çünki futbolçu üçün vaxt çox önəmlidir. Daha çox qollar vurmaq istəyirəm. Uzun illər milli forma ilə bayrağımı sinəmdə qürurla daşımaq niyyətindəyəm.
Futbolun həyatımın mərkəzində olmasını istəyirəm. Ən böyük arzum baş məşqçi olmaqdır. Bir də ata kimi övladımın hər zaman xoşbəxt olmasını istəyirəm. Allah mənə onun xoş günlərini görəcək ömür nəsib etsin. İllər boyu məni dəstəkləyən azarkeşlərimizə çox təşəkkür edirəm. Sizin hər birinizin varlığı mənim üçün böyük gücdür. Söz verirəm ki, bu il sizi daha çox sevindirəcəm. Xoş gəldin, 27! Səndən gözləntilərim böyükdür”.
