“Qələbə qazanmaq vacib idi. Hər iki komanda yaxşı mübarizə apardı. Bol qollu matç ola bilərdi”. Bu sözləri “Neftçi”nin baş məşqçisi Tərlan Əhmədov deyib.
“Ağ-qaralar” Topaz Premyer Liqasının XXVI turunda səfərdə “Qarabağ”ın qonağı olub. Görüş paytaxt təmsilçisinin minimal hesablı qələbəsi ilə başa çatıb.
Oyundan sonra baş tutan mətbuat konfransında iştirak edən mütəxəssis fikirlərini bildirib: “Qələbə sayəsində çempionatı daha da gərginləşdirdik. Bizə dəstək olan hər kəsə təşəkkür edirəm”.
– Avropa Liqasına vəsiqə qazanacağınız halda istefa verəcəksiniz?
– Müqaviləm başa çatır. Mövsümün sonunda bütün suallara aydınlıq gələcək. Qarşımıza qoyulan məqsədə çatmaq istəyirik. Son zamanlar yayılan xəbərlərə görə artıq yorulmuşam. Bura dəvət olunanda demişdilər ki, komanda gözəl futbol sərgiləsin. Mən də söz vermişdim ki, bunu reallaşdıracağıq. İndi avrokuboklara iddialıyıq. Mən buna hələ də inanmıram. Hər halda, gedişat belə oldu.
– Sadıq Sadıqovdan sonra komanda demək olar ki, avrokubok görməmişdi. İndi sizin dövrünüzdə buna çox yaxındı. Rəhbərlik yeni müqavilə təklif etsə belə, istefa verəcəksiz?
– Bu söhbəti çempionatın sonuna saxlayaq. Mən gələndə rəhbərlik qarşısında şərt irəli sürməmişdim. Heç öz briqadamı da gətirməmişdim. Yalnız qışsa Mehman Babayevi – öz sağ əlimi məşqçilər korpusuna cəlb etdim. Qalası olsam, mənim də şərtlərim olacaq.
– Lukas Qomez son dəqiqələrdə əlinə düşən imkanlardan yararlana bilmədi. Onun oyununda razısınız?
– Futbolda həyəcan olur. Lukas qolu vura bilməsə də, yaxşı mübarizə apardı. Müdafiə hücumdan başlayır. Qol vurmasa da, biz başqa keyfiyyətlərə üstünlük veririk.
– Klub daxilində vəziyyətin yaxşı olmadığı deyilir. Bu məsələ doğrudu?
– Əgər belə bir şey yazılıbsa, həqiqətdi.
