Bu günlərdə “Qəbələ”nin rusiyalı çalışdırıcısı Yuri Syomin öz ölkəsinin mətbuatına Rusiya Prezidenti Vladimir Putinin Krım siyasətini dəstəklədiyini demişdi. Onda hələ nə Krımda referendum olmuşdu, nə də yarımadanın Rusiyaya birləşdirilməsinə dair müqavilə imzalanmışdı.
Syomin demişdi ki, Putinin Krımdakı rusları qorumaq təşəbbüsünü – hətta bunun üçün hərbi müdaxiləyə ehtiyac olsa belə – dəstəkləyir: “Mən Krımda rus ordusunun olub-olmadığını bilmirəm. Onu bilirəm ki, orda ruslar yaşayırlar və onlar rəsmi Kiyevdən narazıdırlar. Mənim fikrimcə, bizim prezidentimiz ordakı rusları müdafiə etməklə düzgün addım atır. Məgər ABŞ başqa ölkələrdəki adamlarını müdafiə etmir?”
Rus çalışdırıcının bu açıqlamasından sonra çox şey dəyişib, ən önəmlisi, Krım artıq Rusiya ərazisidi. “Qarabağ”la bugünkü kubok oyunundan sonra dedik, görək birləşdirməyə münasibəti necədi. Qazandığı qələbənin verdiyi ruh yüksəkliyi vardı onsuz da və verdiyim suala ikiqat qalibə xas şəstlə cavab verdi.
– Mən rusam, Rusiya vətəndaşıyam. Prezidentimizin verdiyi qərarı necə dəstəkləməyə bilərəm? Həm də Rusiyanın Krıma müdaxiləsi mütləq idi – orda yaşayan ruslara görə. Bütün rusları narahat edən məsələ idi bu.
– Krımın Rusiyaya birləşdirilməsinə sevindiniz?
– Əlbəttə sevindim! Belə daha yaxşı olacaq!
Vəssalam. Təxminən 40-50 saniyəlik ayaqüstü söhbəti qələmə almaq mənlik idi, şərh vermək və nəticə çıxarmaq da sizin ixtiyarınızda olsun…
Saleh Arslan