Topaz Premyer Liqasının
XVI turu 2 avtoqolla əlamətdar olub.
Korner.az-ın məlumatına görə, arxada qalan 15 turun 75 qarşılaşmasında 3
futbolçu öz qapısına qol vurmuşdusa, bu dəfə 2 oyun günündə eyni sayda avtoqol
qeydə alınıb.
Mövsümün 4-cü, turun ilk
uğursuzu Amit Quluzadə oldu. “Qəbələ”li futbolçu “Simurq”la ev oyununda öz
qapısına qol vurdu. Növbəti belə hadisə isə yenə Sumqayıtda qeydə alındı.
Mövsümün ilk 2 avtoqoluna ev sahibliyi edən arenada bu dəfə meydan sahibləri
sevindi. “Bakı”nın legioneri Mario Alvarez öz qapısına qol vurdu.
Xatırladaq ki, mövsümün
ilk 2 avtoqolu “Sumqayıt”ın ev oyunlarında meydan sahibləri tərəfindən
gerçəkləşmişdi. Adil İbrahimov “İnter”lə, Anar Nəzirov “Qarabağ”la matçda belə
uğursuzluq yaşamışdı. Digər uğursuz isə “Bakı” ilə matçda “Neftçi”
azarkeşlərini üzən Erik Ramos olmuşdu.
Quluzadənin qolu milli
çempionatlar tarixində 121-ci, Alvarezinki 122-ci avtoqol oldu. Hər 2 futbolçu
Azərbaycan çempionatlarında ilk dəfə belə halla rastlaşdı. Klublara gəlincə isə
“Bakı” 8-ci, “Qəbələ” 2-ci dəfə rəqibi üçün qol vurdu. “Simurq” 6-cı,
“Sumqayıt” isə ilk dəfə rəqib qolundan yararlandı.
Alvarez legionerlərin 36-cı avtoqolunun müəllifi oldu. “Bakı”nın
legioneri həm də buna üzülən 2-ci ispaniyalıdır. Mariodan əvvəl Xuan Fransisko
(AZAL) bu il fevralın 16-da, məhz “Bakı” ilə oyunda qapısına qol vurmuşdu.
