“Ştutqart”ın futbolçusu “Qarabağ”da oynamağa razılıq verdi
19.06.2019 , 17:15
“Neftçi”nin sabiq müdafiəçisi Ailton Silva karyerasını “Qarabağ”da davam etdirə bilər.
Korner.az qol.az-a istinadən xəbər verir ki, 24 yaşlı braziliyalı sol cinah müdafiəçisi “Qarabağ”da oynamağa razılıq verib. Hazırda isə danışıqlar futbolçunun müqavilə ilə məxsus olduğu Almaniyanın “Ştutqart” klubu ilə davam etdirilir. Almanlarla da razılıq əldə edilsə, o zaman Ailton yaxın vaxtlarda “Qarabağ”la müqavilə imzalayacaq.
Qeyd edək ki, “Fluminense”nin yetirməsi olan Ailton daha əvvəl – 2015-2016 mövsümündə Azərbaycanda “Neftçi”nin (32 oyun, 3 qol) formasını geyinib. “Ağ-qaralar”dan ayrıldıqdan sonra Portuqaliyanın “Eştoril” (18 oyun) klubuna keçən müdafiəçi daha sonra Almaniya “Ştutqart”ına (5 oyun) transfer olunub. 2018-ci ilin yayında yenidən “Eştoril”ə icarəyə verilən futbolçu mövsümün ikinci yarısını isə Portuqaliya “Braqa”sında keçirib.
