Saşa Stamenkoviç azarkeşlərə səsləndi
“Neftçi”nin qapıçısı Saşa Stamenkoviç “Partizan”la keçiriləcək oyun barədə klubun rəsmi saytına danışıb.
Korner.az-ın məlumatına görə, serbiyalı qapıçı həmyerliləri ilə oyun öncəsi iddialı danışıb:
“Serbiyada “Partizan”la keçirdiyimiz ilk qarşılaşmada rəqib komandanın azarkeşlərinin güclü təzyiqi ilə üzləşmişdik. Şəxsən mənə qarşı 90 dəqiqə ərzində xoşagəlməz şüarlar səsləndirildi. Azarkeşlər və rəqib komandanın futbolçuları bizi təxribata çəkmək istəyirdilər. Bunu anlayaraq səbrlə davrandıq və oyunun sonuna kimi mübarizə apardıq. “Partizan” heç-heçəni həzm edə bilmədiyi üçün oyundan sonra da mənə qarşı təzyiqlər oldu. Bununla belə səfərdən xalla qayıtdıq. “Partizan”la cavab oyunu bu mövsüm evdə keçirəcəyimiz son qarşılaşma olacaq. Bu təkcə bizim yox, azarkeşlərimiz üçün də cavab qarşılaşmasıdır. İstərdim ki, onlar bu oyunda tribunaları doldursunlar və 90 dəqiqə ərzində rəqibi gərginlikdə saxlasınlar. Rəqib azarkeşlər də görsünlər ki, komandamıza və mənə burada necə böyük dəstək var. Qoy “Neftçi”yə olan sevgilərini “Partizan”la oyunda da nümayiş etdirsinlər. Söz verirəm ki, “Partizan”la ilk matçda olduğu kimi bu dəfə də qapını toxunulmaz saxlayacam. Məqsədimiz qrupda ilk qələbəmizi qazanmaqdır. Azarkeşlərimizin köməyi ilə bunun öhdəsindən gələcəyik”.
