Futbol

Stadiona getməmək üçün “daş” kimi səbəblər (YAZI)

19.12.2019 , 21:12

Futbolumuzun son illərdəki “yarası”, sağalmayan yeri… Ölkə futbolumuzun yaralı yerlərindən biri azarkeş problemidir. Çempionat oyunlarında tribunalar, demək olar ki, boş qalır. Maraqlıdır ki, avrokubok oyunlarında bu mənzərə tamamilə fərqli olur. Belə bir sual yaranır: “Azarkeşlər çempionat oyunlarına niyə gəlmir?” Əsas səbəblərdən biri çempionatın səviyyəsinin aşağı olmasıdır. Klubların sayının az olması, rəngarəngliyin olmaması oyunlara marağı azaldır. Premyer Liqada 8 klub mübarizə aparır. Bu da rəqabətsiz çempionatdan xəbər verir. Hər klubun fanatı ola bilər. Amma məsələ orasındadır ki, tamaşaçı kütləsi yoxdur. Azarkeş rəqabət olmayan oyuna nə gələr, nə də izləyər.
Təbii ki, ölkəmizdə futbolu sevən çoxdur. Amma, demək olar ki, çoxu dünya futbolunu izləyir. Əlbəttə ki, bunun bir çox səbəbi var – rəqabət, maraqlı qarşılaşmalar. Bəzən futbolçuya olan sevgi azarkeşləri həmin klubun fanatı olmağa və hər oyunu izləməyə sövq edir. Digər səbəb isə vaxt problemidir. Premyer Liqanın oyunları bəzən elə vaxta salınır ki, azarkeşin stadionlara getməsini çətinləşdirir. Ona görə də azarkeşlər oyunları televizor qarşısında izləməyi seçirlər. Bəzən isə vacib oyunlar istisna olur. Yəni onları stadiona yalnız maraqlı oyun gətirə bilər. Gəlin açıq danışaq, hansı rəqabətsiz oyuna azarkeş gələr?.. Çempionat oyunlarına giriş biletsiz olsa da, futbolumuzun yenə azarkeş problemi var. Bax, bu, artıq ciddi məsələdir. Bu mövzuda çox danışmaq olar. Amma inanmaq istəyirəm ki, nə vaxtsa çempionat oyunları dolu tribunalar qarşısında keçiriləcək. Bunun üçün isə əvvəlcə futbolumuz özünü azarkeşlərimizə sevdirə bilsin. Futbolumuzun başında duranlara sevdirə bilməsə də…

Mina Musayeva

Son yazılar

Yuxarı