Ötən tur keçirilən “Qarabağ” – “Xəzər Lənkəran” qarşılaşmasının nəticəsindən çox meydançaya limon atılması müzakirə mövzusuna çevrildi.
Korner.az-ın məlumatına görə, baş verənlərdən üzüldüyünü bildirən “Qarabağ”ın direktoru Əmrah Çəlikəl limonların stadionun tikinti işləri davam edən hissəsindən meydana atıldığını bildirib.
Yaşananlarla bağlı “Futbol+”ə danışan Çəlikəl yaşananlardan istifadə edib, insanların hissləriylə oynamağa çalışanları da qınamağı unutmayıb:
“Biz artıq araşdırmalarımızı yekunlaşdırmışıq. Stadionun arxa hissəsində tikinti davam edir. Limonları həmin əraziyə daxil olan uşaqlar meydana tərəf atıb. Ərazidəki kameralar bu anı qeydə alıblar. Heç bir kluba qarşı mənfi münasibətimiz yoxdu. “Xəzər Lənkəran”ın həm rəhbərliyi, həm də azarkeşləriylə gözəl münasibətimiz var. Mən hadisənin normal bir şey olduğunu qəbul etmirəm. Bizim xəbərimiz olmadan stadionun kənarında belə bir olay yaşanıb. Başverənlər “Qarabağ”la “Xəzər Lənkəran” arasında olan xoş münasibətləri korlaya bilməz. Biz Azərbaycanı birlikdə təmsil edirik. “Xəzər Lənkəran” da fəxrimizdi, başqa komandalar da. O cümlədən “Qarabağ” bu gün bir brenddi, Azərbaycanı qitə arenasında layiqincə təmsil edirik.
İrqçilik, bölücülük fikirləri səsləndirilir. Sponsorumuz haqqında ağızlarına gələni yazırlar. Futbolçuları, sponsorları bu işdən soyutmaq olmaz. Əksinə, onları həvəsləndirmək lazımdı. Hamı bilir ki, indiki vəziyyətdə klublara sponsorluq etmək asan deyil.
Bu xırda hadisəni Qarabağ camaatıyla Lənkəran camaatı arasında problem kimi qələmə vermək düzgün deyil. Tərəfimizdən bütün lazımı tədbirlər görüləcək”.
