Avropa Liqasından biabırçılıqla kənarlaşan "Xəzər Lənkəran" ətrafında söz-söhbətlər səngimək bilmir. Bu hadisə oxucuların qəzəbiylə müşayiət olunmaqdadı. Dünənki 0:8-in "qəbzi" 4 futbolçuya kəsilib. Hələ ki… Ona görə "hələ ki" yazırıq ki, siyahının uzanacağı istisna deyil, gözləniləndi. Komandadan "nizam intizamı pozmaqda" günahlandırılaraq qovulanlardan biri də Eder Bonfim oldu. Klubun açıqlamasında sırf intizamı pozduğuna görə qovulduğu deyilir, amma…
Saytımızın e-mailinə bu gün göndərilən bir e-mail şok effekti yaradacaq, şübhəsiz. Adını hələ açıqlamağı lazım bilmədiyimiz oxucumuzun məktubunu nöqtə-vergülünə toxunmadan diqqətinizə çatdırırıq:
"Salam hörmətli korner.az portalı əməkdaşları, əslində sizə bu yazını Makkabi H – XL oyunundan öncə yazacaqdım sadəcə Lənkərandakı oyunöncəsi artıq söz-söhbət yaranmasın deyə indi yazmaq məcburiyyətindəyəm. Dünən bütün futbolsevərlər kimi mən də əsəbdən cin atına minmişdim. Futbol adına böyük bir yeni bir ləkə yarandı. Çox etibarlı mənbədən əldə etdiyim bilgiyə görə Maltada Toşak komanda 1 günlük istirahət verərkən Eder Bonfim gecəyarısı çox içkili vəziyyətdə, müvazinətini itirmiş halda bazaya gəlib. XL-də intizamsızlıq, oyunçuların harınlaması halı baş qaldırıb. Hətta Babək Quliyevin XL-dən qovulmasını da oyunçular təşkil edib. Futbolçular (əslində onlara futbolçu deməyə dilim gəlmir) bazaya əksər hallarda içki keçirdirlər və bunu bütün komanda bilir. Toşakdan başqa. Buna qarşı çıxan yeganə Babək Quliyev olub. Onun da torbasını tikmək üçün oyunçular bir gün yalandan məlumat veriblər ki, Bonfim otaqda içki içir. Babək Quliyev otağı araşdırarkən belə halın olmadığını görür və Bonfim və digərləri bunu fürsət bilib Toşaka Babəkin onları tez-tez narahat etdiyini deyirlər və beləcə Babək Quliyev komandadan qovulur. Bütün bu məlumatları Lənkəranda çox insan bilir və məlumatın mənbəyi mətbuat katibi Hüseyn Cəbrayıloğlu bəzi insanlara deyib. Çox maraqlıdır Hüseyn bəy niyə susur. Vaxtilə Lənkərandakı bütün həqiqətləri dilə gətirən insan indi vəzifəsini itirməmək üçün susur. Belə çıxır ki, hər şey vəzifə üçün imiş. Mənim dərdim nə Hüseynlə nə də kimləsədir. Məni XL dərdi götürüb. Xahiş edirəm bütün yazılanları nəzərə aləb ən azından araşdırın və kimlər günahkardır (tuyqunkimilər) onların futboldan uzaqlaşmasında bizə yardımçı olun".
Məsələylə bağlı "Xəzər Lənkəran"ın da mövqeyini öyrənmişik. Saytımızı izləyin, az sonra o məlumatı da yayımlayacağıq.
