“Simurq” klubunun növbəti mövsümə hazırlıq prosesinin proqramı müəyyənləşib.
Korner.az-ın klubun rəsmi saytına istinadən verdiyi məlumata görə, hazırda istirahətdə olan komanda iyunun 15-də Bakı şəhərində toplaşacaq.
Tibbi müayinədən keçdikdən sonra baş məşqçi Georgi Çixradzenin rəhbərliyi altında sarı qaralar növbəti mövsümün hazırlıq prosesinə start verəcək.
“Simurq” iyunun 23-nə qədər paytaxtda məşqləri davam etdirəcək. Daha sonra təlim-məşq toplanışının növbəti mərhələsi üçün komanda tam heyətlə Türkiyəyə yola düşəcək. Kocaelinin Kartepe istirahət zonasında məskunlaşacaq “Simurq” iyulun 6-na qədər burada hazırlıq prosesi keçəcək.
Türkiyədəki təlim-məşq toplanışından sonra “Simurq” Zaqatalaya qayıdacaq. Burada da, bir həftəlik hazırlıq prosesindən sonra komanda qısa müddətli istirahətə buraxılacaq. Daha sonra isə toplanışın ikinci mərhələsi üçün Zaqatala təmsilçisi yenidən bir araya gələcək.
Qeyd edək ki, Türkiyədəki toplanış zamanı Georgi Çixradze yetirmələrini üç yoldaşlıq görüşündə sınaqdan keçirəcək. Eləcə də, yerli futbolçularla yanaşı, bir neçə legioner futbolçu da burada baxışa dəvət olunacaq.
