Antalyanın Bələk bölgəsində təlim-məşq toplanışında olan "Simurq" klubu ötən gün iki məşqə çıxıb.
Korner.az-ın klubun rəsmi saytına istinadən verdiyi məlumata görə, səhər hazırlığında Georgi Çixradzenin komandası əsasən taktiki tapşırıqlar üzərində çalışıb.
İsinmə hərəkətlərindən sonra qısa ötürmələrə keçilib. Daha sonra isə mövqelərinə görə qruplara bölünən futbolçular kollektiv hücum və müdafiə üzərində məşq edib. Hazırlığın sonunda isə standart vəziyyətlərdən qapıya zərbələr üzrə məşqçilər korpusunun tapşırıqlar yerinə yetirilib.
Axşam məşqində "Simurq" uzun məsafəyə qaçış və isinmə hərəkətlərindən sonra, qruplara bölünərək "kvadrat" oynayıb. Sonda isə qapıya zərbələr və penaltilər üzərində çalışılıb.
Qapıçılar David Piterzkeiviç və Dmitri Kramarenko qapıçılarla işləyən məşqçi Emil Babayevin rəhbərliyi altında komandadan ayrı, xüsusi məşq edib. Gənc əlcək ustası Eyyub Əliyev isə 19 yaşdan ibarət Azərbaycan yığmasının düşərgəsinə qoşulduğundan hazırlıqlarda iştirak etməyib.
Zaqatala təmsilçisi sabah Bakı vaxtı ilə 17:00-da Antalya hazırlığı çərçivəsində növbəti yoxlama görüşünə çıxacaq. Komandanın rəqibi Xorvatiyanın məhşur "Slaven Belupo" klubu olacaq. 1907-ci ildə qurulun bu komanda son illərdə Avropa kuboklarında boy göstərən Xorvatiya təmsilçisidir. Bu mövsüm "Slaven Belupo" Avropa Liqasınının 3-cü mərhələsində "Atletiko Bilbao"nu evində 2:1 hesabı ilə məğlub etsə də, səfərdə 3:1 uduzması onların tur atlamasına mane oldu.
