“Simurq” “təyyarəçilər”lə oyuna hazırdı

Azərbaycan Premyer Liqasının hazırkı lideri "Simurq" X tur çərçivəsində qarşı-qarşıya gələcəyi AZAL-la oyunun hazırlıqlarını tamamlayıb.

Korner.az-ın klubun rəsmi saytına istinadən verdiyi məlumata görə, bu gün tam heyətlə məşqə çıxan komanda artıq istirahətə çəkilərək oyunun start fitini gözləməyə başlayıb.

17-ci dəfə AZAL-la qarşılaşacaq "sarı-qaralar" keçirilən son səkkiz oyunda rəqibini məğlub edə bilməyib. Ötən tur "İnter"ə minimal hesabla məğlub olaraq qələbələr seriyasını davam etdirə bilməyən "Simurq" üçün bu oyun çox önəm daşıyır. Çünki komanda həm liderliyini qorumaq, həm də "təyyarəçilər"ə olan sindromu qırmaq istəyir.

Qeyd edək ki, qonaqlar Zaqatala şəhər stadionunda keçirilən son 4 qarşılaşmada "Simurq"u məğlub edib. "Simurq" – AZAL oyunu saat 18:00-da başlayacaq.