“Fasilədən mümkün qədər yararlanıb, çıxışımızı tam hazır formada davam etdirəcəyik. “Simurq” yaxşı tanıdığımız bir komandadı. Yaranan fasilə Zaqatala klubu ilə matça yaxşı hazırlaşmaq üçün imkan verdi. Lazımınca hazırlaşıb səfər matçına qələbə üçün gedəcəyik”.
Korner.az-ın məlumatına görə, bu sözləri “Qəbələ”nin üzvü Elvin Camalov deyib.
Gənc futbolçu klubun rəsmi saytına açıqlamasında ilk 4 turdakı çıxışını da dəyərləndirib:
“Fikrimcə, 4 turdan sonra nə isə söyləmək hələ tezdi. “Qəbələ” mövsümlərarası fasilədə heyətinə yeni oyunçular qatan komandadı. Bu üzdən də futbolçular arasında anlaşmanın, uyğunlaşmanın istənilən səviyyədə olması üçün müəyyən zamana ehtiyac var idi. Ümid edirəm ki, qarşıdakı oyunlarda bütün bunlar qaydasına düşəcək və qələbələri sıralayacağıq. Heyətin yeni qurulduğunu nəzərə alsaq, ilk 4 turdan sonra 6 xal toplamağımızı yaxşı nəticə kimi dəyərləndirmək olar. Növbəti turlarda “Qəbələ” potensialını tam ortaya qoya biləcək”.
