"Qarabağ" sabah Premyer Liqanın XXIV turunda "Qəbələ"ni qəbul edəcək. Ağdam klubu bu mövsüm kubok da daxil olmaqla artıq 5-ci dəfə üz-üzə gələcəyi rəqiblə oyunda ilk qələbəsini qazanmaq istəyir.
Korner.az-ın məlumatına görə, Ağdam klubunun bombardiri Riçard Almeyda oyunöncəsi klubun rəsmi saytına açıqlama verib: "Qəbələ"də olduqca güclü futbolçular var. Bu il onlarla oyunlarımız olduqca çətin keçib.
Bu dəfə də istisna deyil. Komandamız uzun müddətdi bir yerdə məşq etmir. Cəmi 2 dəfə birlikdə məşq etmək şansımız olub. Amma şikayətlənmək zamanı deyil, qələbə qazanmaq lazımdı. "Simurq"a məğlubiyyət bizə dərs oldu. Aradakı məsafə səhvlərimizdən nəticə çıxarmaq üçün yetərli oldu.
Oyun çox çətin olacaq. Rəqibimizin avrokubok üçün tək yolu çempionatda uğur qazanmaqdı. Ona görə də 3 xal üçün hər şey edəcəklər. Amma biz də eyni məqsəd üçün meydana çıxacağıq.
Komandamızda itkilər var. Amma bu bizə bəhanə ola bilməz. Yeni transferlərimiz Reynaldo, Torres də düzəliblər. Opara da səviyyəsini hiss etdirir. Sabah 3 xal qazanıb rəqibə qarşı uğursuz sindroma son qoymaq istəyirik".
